پشاور(پاکستان پوائنٹ نیوز28۔ستمبر۔2018ء) پشاور وچ ٹریفک پولیس اہلکار نے رشوت لین توں انکار کر دتا۔ تفصیل مطابق سٹی پولیس نے رشوت لین توں انکار کرن والے اہلکار لئی نقد انعام دا اعلان وی کر دتا۔ ٹریفک پولیس اہلکار آصف رضا دی اک ویڈیو سوشل میڈیا اُتے وائرل ہوئی۔ ویڈیو وچ آصف رضا نے رشوت دی آفر مگروں رشوت لین توں انکار کیتا۔ ویڈیو دے وائرل ہون مگروں ای پشاور کپیٹل سٹی پولیس افسر قاضی جمیل نے اعلان کیتا کہ ذکر کیتے ٹریفک پولیس اہلکار نوں 5ہزار انعام دے طور اُتے دتا جائے گا۔
اوہناں نے آکھیا کہ آصف رضا نوں اپنے کم نال جُڑت تے ایمانداری دا وکھالا کرن اُتے حوصلا افزائی سند وی دتی جائے گی۔ آصف رضا نے غیر قانونی طور اُتے پولیس لیزر لان والی گڈی نوں روکیا۔ ایبٹ آباد توں تعلق رکھن والے ڈرائیور دی گڈی روک کے ٹریفک پولیس اہلکار آصف رضا نے اوہدی پولیس لائٹ نوں قبضے وچ لے لیا۔ آصف رضا نے کسے طور اُتے لائٹ واپس کرن اُتے رضا مندی ظاہر نہ کیتی۔ جیہدے اُتے ڈرائیور نے آصف رضا نوں 300رُپئے رشوت دی آفر کیتی۔ پر جواب وچ آصف رضا نے آکھیا کہ بے شک مینوں تُسیں 3ملین وی دے دیو میں رشوت نہیں لواں گا۔پر بعدوں آصف رضا نے پشاور وچ پروہنا(مہمان) ہون دی وجہ توں ڈرائیور نوں جان دی اجازت دے دتی۔
