پٹرولیم وستاں دیاں قیمتاں وچ 4رُپئے تیکر وادھے دا امکان

پٹرولیم وستاں دیاں قیمتاں وچ 4رُپئے تیکر وادھے دا امکان

اسلام آباد(پاکستان پوائنٹ نیوز28۔ستمبر۔2018ء) پٹرولیم وستاں دیاں قیمتاں وچ چار رُپئے لیٹر تیکر وادھے دا امکان،پٹرولیم وستاں دیاں قیمتاں وچ وادھے دا حتمی فیصلا 30ستمبر نوں کیتا جائے گا، وادھے دی صورت وچ اطلاق پہلی اکتوبر نوں ہوئے گا۔ تفصیل مطابق 22ستمبر نوں ملن والی خبر مطابق پٹرولیم وستاں دیاں قیمتاں وچ 10رُپئے تیکر وادھے دا امکان ظاہر کیتا گیا سی۔

وزارت پٹرولیم نے دسیا کہ پہلی اکتوبر توں پٹرول 6رُپئے30پیسے، مٹی دا تیل 10رُپئے،لائٹ ڈیزل4رُپئے تے ہائی سپیڈ ڈیزل 8رُپئے 50پیسے مہنگا ہون دا امکان اے۔ پٹرولیم وستاں دیاں قیمتاں وچ وادھا وزارت پٹرولیم دی منظوری مگروں کیتا جائے گی پر ایس حوالے نال اجے کوئی حتمی اعلان نہیں کیتا گیا۔ ایس توں چالو مہینے قومی اسمبلی دے اجلاس وچ خطاب کردے ہوئے وفاقی وزیر خزانہ اسد عمر نے آکھیا سی کہ بجٹ وچ تبدیلی نہ کیتی گئی تے اوکڑاں پیدا ہوسکدیاں نیں۔

اوہناں نے لوکائی نوں مہنگائی دے طوفان توں خبردار کیتا۔ اوہناں دا کہنا سی کہ رُپئے دی قدر وچ لگاتار کمی آ رہی اے جیہدے مگروں زرمبادلا دے ذخائر تیزی نال ڈگ رہے نیں۔ اوہناں دا ہورکہنا سی کہ زرمبادلا دے ذخائر ڈگن نال لوکائی نوں مہنگائی دا ساہمنا کرنا پے سکدا اے۔ اوہناں دا کہنا سی کہ جے رُپئے دی قدر ایس طرحاں ڈِگدی رہی تے پٹرول دی قیمت 20رُپئے فی لیٹر ودھ سکدی اے۔