لاہور(پاکستان پوائنٹ نیوز27۔ستمبر۔2018ء) پاکستان تحریک انصاف دے چیئرمین و وزیر اعظم عمران خان دی بیوی بشری بی بی نے عمران خان نوں بہت سادہ تے شفاف انسان قرار دیندے ہوئے آکھیا اے کہ عمران خان نوں دنیا دی کسے شے دا لالچ نہیں اے، عمران خان نال ویاہ توں پہلاں زندگی وچ لوک اللہ تے رسول دے نیڑے ہون لئی میرے کول آؤندے سن پر ایس زندگی وچ لوک خان صاحب دے نیڑے ہون لئی آؤندے نیں۔
تفصیل مطابق وزیراعظم عمران خان دی گھر والی بشری بی بی نے اج اپنا پہلا انٹرویو دتا۔ انٹرویو دوران مجمان دے سوال کہ ’عمران خان نال ویاہ ہون مگروں تُسیں خاتون اول بنیاں، کیہ تبدیلی محسوس کر رہے او؟دے جواب وچ بشری بی بی نے آکھیا کہ سبھ لوگ آکھدے نیں کہ میری وجہ توں خاں صاحب وچ تبدیلی آئی اصل وچ ساڈے دوناں دی وجہ توں اک دوجے وچ تبدیلی آئی اے۔
اک ہور سوال کہ اوہ زندگی پرسکون سی جیہدے وچ بشری بی بی تنہائی وچ بیٹھدیاں سن تے کوئی درد مند آ گیا رہنمائی حاصل کرن لئی کوئی سوال لے کے یاں فیر ایہ زندگی بہتر محسوس کردے او؟دے جواب وچ بشری بی بی دا کہنا سی کہ اوس زندگی وچ لوک اللہ تے رسولنیڑے ہون لئی میرے کول آؤندے سن پر ایس زندگی وچ لوک خان صاحب نیڑے ہون لئی آؤندے نیں۔ خاتون اول بشری بی بی نے اک ہور سوال کہ انسان ہون دی حیثیت نال عمران خان بارے تہاڈی کیہ رائے اے؟دے جواب وچ آکھیا کہ اوہ بہت سادہ تے شفاف قسم دے انسان نیں۔
دنیا دی کسے شے دا وی اوہناں نوں کوئی لالچ نہیں اے۔ یاد رہوے کہ بشری بی بی دا ایہ پہلا انٹرویو اے، ایس توں پہلاں بشری بی بی دے بیان تے اوہناں دے مختلف اداریاں دے دورے بارے خبراں ساہمنے آؤندیاں رہیاں نیں ۔
