لاہور(پاکستان پوائنٹ نیوز26۔ستمبر۔2018ء) مشہور پرچا کار رؤف کلاسرا دا کہنا اے کہ جے اج میڈیا آزاد اے تے ایس آزادی پچھلے میڈیا دے سبھ توں وڈے بینفیشری عمران خان نیں پر جے ہن عمران خان دے ساتھی اوہناں نوں ایہ دسن کہ فلاں چینل اُتے تہاڈے خلاف گل بات ہو رہی سی پر ہن تہاڈے خلاف انج دیاں گل نہیں ہونیاں چاہیدیاں کیونکہ ہن تُسیں وزیر اعظم او۔ تے عمران خان اک گل ذہن وچ رکھ لین کہ ایس ملک وچ عدلیہ تے میڈیا جے آزاد نہیں ہون گے تے تُسیں اجیہا قانون لیان دی کوشش کرو گے جیہدے نال میڈیا دا گلا گھٹن دی کوشش کیتی جائے گی تے فیر تُسیں تسلی رکھو کیونکہ تہاڈے توں پہلاں نواز شریف ایہ کم کر چکے نیں اوہ اپنا چیئرمین پیمرا لیائے تے فیر جو حال ہویا اوہ سبھ دے ساہمنے اے۔
رؤف کلاسرا دا کہنا سی کہ عمران خان نے وی اپنا میڈیا سیل بنایا ہویا اے پر اوہ مندے نہیں نیں۔ حالانکہ سبھ دیاں تصویراں موجود نیں جیہناں نال عمران خان ملاقاتاں کردے نیں۔ تے فیر اوہ اگلے دن آ کے ٹی وی اُتے گالھاں کڈھدے نیں پر عمران خان بہت معصوم بندے نیں۔ تے مریم نواز وی ایہو کم کردیاں سن تے آکھدیاں سن کہ میرے سوشل میڈیا دے شیرو تے فیر اوہناں دی ملاقات نواز شریف نال وی کرواندیاں نیں۔
رؤف کلاسرا دا آکھنا سی کہ تُسیں بے شک میڈیا لئی قانون لیاؤ پر چنگیاں حکومتاں لوکاں توں پہلے پاور لیندیاں نیں فیر پاور مختلف اداریاں وچ ونڈیاں جاندیاں نیں تے اوہنوں طاقتور بناندیاں نیں۔ پر نویں حکومت تے اپنے آپ نوں ای طاقتور بنان اُتے تلی ہوئی اے۔ اوہناں نے ہُنے ای پیمرا نوں آکھنا شروع کر دتا اے کہ فلاں چینل خلاف ایہ اقدامات کرنے نیں۔
