اسلام آباد(پاکستان پوائنٹ نیوز26۔ستمبر۔2018ء) سپریم کورٹ آف پاکستان وچ مارگلا ہلز دی کٹائی بارے کیس دی سنوائی ہوئی۔ تفصیل مطابق سنوائی دوران چیف جسٹس آف پاکستان جسٹس میاں ثاقب نثار تے بحریہ ٹاؤن دے چیئرمین ملک ریاض وچکار دلچسپ مکالمہ ہویا۔ سپریم کورٹ وچ اج ہون والے کیس دی سنوائی دوران چیف جسٹس نے آکھیا کہ بحریہ انکلیو نے بہت ساری سرکاری زمین گھیری ہوئی اے۔
لوکاں دے سرکاری زمین اُتے گھر بن گئے نیں۔ چیف جسٹس نے آکھیا کہ سُنیا اے کہ بحریہ ٹاؤن اسلام آبا دی حد بندی وی ہوئی اے۔ سنوائی دوران ایڈیشنل اٹارنی جنرل نے آکھیا کہ بحریہ ٹاؤن دا دفتر نیشنل پارک دی زمین اُتے بنیا اے۔ جیہدے اُتے چیف جسٹس میاں ثاقب نثار نے چیئرمین بحریہ ٹاؤن نوں مخاطب کردے ہوئے آکھیا کہ ملک ریاض!کیہ تہاڈے کول اک ہزار ارب رُپئے ہے نیں؟جیہدے اُتے ملک ریاض نے جواب دتا کہ میرے کول اک سو ارب وی نہیں نیں۔
چیف جسٹس نے آکھیا کہ ملک صاحب جو تجاوزات تُسیں بنائیاں نیں اوہناں دی ادائیگی کرنی پئے گی۔ ملک ریاض کول جے پیسہ نہیں تے کیہدے کول اے؟پورے ملک دا پیسہ ملک ریاض کول اے۔ ملک ریاض نے آکھیا کہ میرے کول حلال دا پیسہ اے حرام دا نہیں۔ جیہدے اُتے چیف جسٹس نے جواب دتا کہ تہانوں کدوں آکھیا کہ پیسہ حرام دا اے؟چیف جسٹس نے ملک ریاض نوں ہدایت کیتی کہ آؤندی سنوائی اُتے اک ہزار ارب رُپئے دا بندوبست کر کے آؤ۔ ملک ریاض دا کہنا سی کہ اک ہزار ارب تے امریکا کول وی نہیں ہوئے گا۔
