نیویارک(پاکستان پوائنٹ نیوز26۔ستمبر۔2018ء) وزیر خارجا شاہ محمود قریشی نے ملک وچ قانون دی حکمرانی قائم کرن تے کرپشن نوں جڑھوں پٹن دے حکومتی عزم نوں اُجاگر کردے ہوئے آکھیا اے کہ 25جولائی دے عام انتخابات وچ پاکستانی لوکائی نے واضح طور اُتے تبدیلی دے حق وچ اپنا فیصلا دتا اے۔ اوہناں نے ایہ گل امریکی تھنک ٹینک انٹلانٹک کونسل دے آہر ہیٹھ کاروباری رہنماواں، تجزیہ کاراں تے ابلاغ وسیلیاں دے نمائندیاں دے اکٹھ نال خطاب کردے ہوئے آکھی۔
وزیر خارجا نے کاروبار دوست پاکستان لئی نویں حکومت دا ویژن پیش کردے ہوئے آکھیا کہ لکھاں پاکستانی نوجواناں لئی روزگار دے موقعے پیدا کرنا حکومت دی ترجیح اے۔ شاہ محمود قریشی نے سرمایہ کاری دے ماحول تے موقعے بارے رلتیاں نوں دسدے ہوئے آکھیا کہ پاکستان متوسط طبقے دی بہت وڈی مارکیٹ اے تے ایتھے وڈی نوجواناں دی قوت موجود اے۔اوہناں نے آکھیا کہ پاکستان وچ کاروبار لئی غیر ملکی کمپنیاں لئی صورتحال وچ ہور بہتری لیاندی جائے گی۔
کئی مشہور وڈیاں کارپوریشناں تے بین الاقوامی فرنچائز کمپنیاں پہلے توں کم کر رہیاں نیں کئی دہاکیاں توں منافع بخش کاروبار کر رہیاں نیں۔ وزیر خارجا نے خاص طور اُتے ’ٹیلی نار گروپ‘ دے چیف ایگزیکٹو افسر تے صدر سگوی بریکی دا شکریہ ادا کیتا جو پاکستان دی سرمایہ کاری دی صلاحیت بارے گل بات لئی ناروے توں آئے سن۔
