کراچی(پاکستان پوائنٹ نیوز24۔ستمبر۔2018ء) متحدہ اپوزیشن نے کالا باغ ڈیم دی اُساری خلاف تے بھاشا ڈیم دی حمایت وچ سندھ اسمبلی وچ قرار داد جمع کروا دتی، قرارداد پی ٹی آئی، ایم کیو ایم تے جی ڈی اے ارکان دے دستخط نیں، متحدہ اپوزیشن دی قرار داد وچ آکھیا گیا اے کہ تن صوبے کالا باغ ڈیم خلاف قرارداداں منظور کر چکے نیں۔ کالا باغ ڈیم اک جھیڑوا(متنازعہ) منصوبہ اے جیہدے اُتے کوئی سانجھی رائے نہیں اے ایس لئی اوہ منصوبہ جیہنوں تن صوبیاں دی لوکائی رد کر چکی اے کسے صورت نہیں بننا چاہیدا۔
قرار داد وچ آکھیا گیا کہ پانی دے وسائل اُتے سبھ دا حق اے کالا باغ ڈیم دی اُساری نال سندھ نوں نقصان ہوئے گا۔ قرارداد وچ ہور آکھیا گیا کہ سندھ دی لوکائی نوں کالا با غ ڈیم اُتے خدشے نیں۔ متحدہ اپوزیشن نے قرارداد راہیں بھاشا ڈیم دی اُساری نوں ملک لئی ضروری قرار دتا تے آکھیا کہ بھاشا ڈیم اُتے سارے صوبیاں دی سانجھ اے تے ایس منصوبے اُتے کسے نوں خدشہ نہیں ایس لئی بھاشا ڈیم پاکستان دے بہتر مستقبل لئی ضروری اے۔ بعدوں میڈیا نال گل بات کردے ہوئے متحدہ اپوزیشن دے رہنما فردوس شمیم نقوی، ایم کیو ایم دے کنور نوید جمیل، جی ڈی اے دے بیرسٹر حسنین مرزا نے آکھیا کہ آبی منصوبیاں خلاف نہیں پر جس منصوبے نوں وڈی گنتی رد کر چکی اے اوس منصوبے نوں نہیں بننا چاہیدا۔
