اسلام آباد(پاکستان پوائنٹ نیوز22۔ستمبر۔2018ء) حکومت نے لوکائی اُتے پٹرول بم ڈیگن دی تیاری کر لی۔ پہلی اکتوبر توں پٹرولیم وستاں(مصنوعات) دیاں قیمتاں وچ وادھے دا امکان ظاہر کیتا جا رہیا اے۔ تفصیل مطابق وزارت پٹرولیم دے وسیلیاں نے دسیا اے کہ پہلی اکتوبر توں پٹرول 6رُپئے30پیسے، مٹی دا تیل 10رُپئے،لائٹ ڈیزل4رُپئے تے ہائی سپیڈ ڈیزل 8رُپئے 50پیسے مہنگا ہون دا امکان اے۔
پٹرولیم وستاں دیاں قیمتاں وچ وادھا وزارت پٹرولیم دی منظوری مگروں کیتا جائے گی پر ایس حوالے نال اجے کوئی حتمی اعلان نہیں کیتا گیا۔یاد رہوے کہ ایس توں پہلاں قومی اسمبلی دے اجلاس وچ خطاب کردے ہوئے وفاقی وزیر خزانہ اسد عمر نے آکھیا سی کہ بجٹ وچ تبدیلی نہ کیتی گئی تے اوکڑاں پیدا ہوسکدیاں نیں۔اوہناں نے لوکائی نوں مہنگائی دے طوفان توں خبردار کیتا۔ اوہناں دا کہنا سی کہ رُپئے دی قدر وچ لگاتار کمی آ رہی اے جیہدے مگروں زرمبادلا دے ذخائر تیزی نال ڈگ رہے نیں۔ اوہناں دا ہورکہنا سی کہ زرمبادلا دے ذخائر ڈگن نال لوکائی نوں مہنگائی دا ساہمنا کرنا پے سکدا اے۔ اوہناں دا کہنا سی کہ جے رُپئے دی قدر ایس طرحاں ڈِگدی رہی تے پٹرول دی قیمت 20رُپئے فی لیٹر ودھ سکدی اے۔
