اسلام آباد(پاکستان پوائنٹ نیوز22۔ستمبر۔2018ء) وفاقی وزیر خارجا شاہ محمود قریشی اقوام متحدہ دی جنرل اسمبلی دے اجلاس وچ رلت لئی چلے گئے۔ جان توں پہلاں وزیر خارجا دا عوامی انداز اوس ویلے ساہمنے آیا جدوں اوہ ائر پورٹ اپڑے تے عام لوکاں وانگ لائن وچ کھلوتے رہے۔ میڈیا رپورٹ مطابق وفاقی وزیر خارجا شاہ محمود قریشی بغیر پروٹوکول ائر پورٹ اپڑے تے بورڈنگ پاس دی لائن وچ عام لوکاں وانگ مسافراں نال کھلو تے ۔
لوکاں نے وفاقی وزیر خارجا نوں اپنے وچکار ویکھ کے تصویراں وی بنوائیاں۔ یاد رہوے کہ وفاقی وزیر خارجا اقوام متحدہ دی جنرل اسمبلی دے اجلاس وچ رلت لئی نیویارک گئے نیں۔شاہ محمود قریشی او آئی سی وزرائے خارجا کنٹیکٹ گروپ وچ وی رلت کرن گے۔ وزیر خارجا ای سی او وزرائے خارجا کونسل آف منسٹرز وچ پاکستان دی نمائندگی کرن گے۔ترجمان دفتر خارجا مطابق وفاقی وزیر خارجا شاہ محمود قریشی واشنگٹن وچ پاکستانی کمیونٹی دے پروگرام وچ رلت کرن گے جدکہ اوہ واشنگٹن وچ دو دن رہن مگروں نیویارک چلے جان گے۔
جتھے اوہ 24ستمبر توں نیویارک وچ ہون والے اقوام متحدہ دے جنرل اسمبلی اجلاس وچ رلت کرن گے۔وزیر خارجا 26ستمبر نوں سارک وزرائے خارجا کونسل دے اجلاس وچ وی رلت کرن گے تے 29ستمبر نوں پاکستانی وزیر خارجا نیویارک وچ اقوام متحدہ دی جنرل اسمبلی نال خطاب کرن گے۔
