حنیف عباسی دی اٹک جیل منتقلی، اڈیالا جیل وچ سرچ آپریشن

حنیف عباسی دی اٹک جیل منتقلی، اڈیالا جیل وچ سرچ آپریشن

راولپنڈی(پاکستان پوائنٹ نیوز22۔ستمبر۔2018ء) مسلم لیگ (ن) دے رہنما حنیف عباسی دی اڈیالا جیل توں اٹک جیل منتقلی مگروں اڈیالا جیل وچ سرچ آپریشن کیتا گیا۔ تفصیل مطابق آئی جی جیل خانہ جات دی سربراہی وچ قائم کیتی جان والی کمیٹی نے اڈیالا جیل وچ سرچ آپریشن کیتا۔ دوجے پاسے حنیف عباسی دی گھر والی دا کہنا اے کہ حنیف عباسی دل دے روگی نیں تے اوہناں نوں پولن الرجی اے، وڈی عید توں پہلاں اوہناں دا اسٹنٹ وی پایاگیا۔

حنیف عباسی نوں اوہناں دیاں دوائیاں نہیں اپڑائیاں جا رہیاں۔ حنیف عباسی دی گھر والی دا کہنا سی کہ جے حنیف عباسی نوں کُجھ ہویا تے سیاسی مخالف تے پنجاب حکومت ذمے وار ہوئے گی۔ یاد رہوے کہ ایفی ڈرین کیس وچ سزا کٹن والے مسلم لیگ (ن) دے رہنما حنیف عباسی نوں اڈیالا جیل توں اج اٹک جیل منتقل کر دتا گیا اے۔ وسیلیاں مطابق حنیف عباسی نوں آئی جی جیل خانہ جات دے حکم اُتے اٹک جیل منتقل کیتا گیا۔ حنیف عباسی دی جیل سپرنٹنڈنٹ دے کمرے وچ نواز شریف نال تصویر ساہمنے آن اُتے انکوائری کمیٹی بنائی گئی۔ جیہدے مگروں حنیف عباسی نوں انکوائری کمیٹی دی تجویز اُتے اٹک جیل منتقل کر دتا گیا۔