لاہور(پاکستان پوائنٹ نیوز22۔ستمبر۔2018ء) سابق وزیر اعظم نواز شریف نے جیل توں باہر آؤندے ای عام انتخابات2018وچ پارٹی دی ناکامی دی وجہ جانن لئی پُن چھان کرن دا فیصلا کر لیا اے۔ میڈیا رپورٹ مطابق سابق وزیر اعظم نواز شریف تے اوہناں دی دھی مریم نواز نے جیل توں باہر آؤندے ای عام انتخابات2018وچ ہار دی وجہ تے پارٹی قیادت ولوں کمزور انتخابی مہم چلائے جان دا نوٹس لے لیا تے ایس سارے معاملے دیاں پُن چھان آپ کرن دا فیصلا کیتا اے۔
ایس سلسلے وچ (ن) لیگ نے شہباز شریف کولوں جواب وی منگ لیا اے۔ ایہو نہیں بلکہ اوہناں نے ہور پارٹی رہنماواں دے مطالبے اُتے عام انتخابات 2018توں لے کے ہن تیکر شہباز شریف دیاں کمزور پالیسیاں اُتے وی جواب منگیا اے۔ وسیلیاں دا آکھنا اے کہ نواز شریف عام انتخابات2018وچ کُجھ حلقیاں توں مسلم لیگ (ن) دے ٹکٹ ہولڈرز دے ہارن اُتے حیران وی نیں۔ ایہناں امیدواراں وچ حلقہ این اے 57توں شاہد خاقان عباسی، این اے 131توں سعد رفیق ، این اے 108توں عابد شیر علی تے این اے 62توں دانیال چودھری شامل نیں۔ اوہناں دا کہنا اے کہ انج دے امیدواراں دا الیکشن وچ ہار جانا سمجھوں باہر اے۔
