اسلام آباد(پاکستان پوائنٹ نیوز19۔ستمبر۔2018ء) نواز شریف دی سزا دا مقصد عمران خان داالیکشن لئی راہ پدھر کرنا سی۔تفصیل مطابق اج اسلام آباد ہائی کورٹ نے سابق وزیر اعظم نواز شریف، اوہناں دی دھی مریم نواز تے داماد کیپٹن (صفدر) دی سز ا معطل کردے ہوئے اوہناں نوں رہا کرن دا حکم جاری کر دتا اے۔ عدالت نے نواز شریف، مریم نواز تے کیپٹن (ر) صفدر نوں 5,5لکھ رُپئے دے ضمانتی مچلکے وی جمع کروان دا حکم دتا۔
اسلام آباد ہائی کورٹ وچ فیصلے ویلے پارٹی صدر شہباز شریف، پارٹی دے مرکزی رہنما و پارٹی کارکن وی موجود سن۔ اسلام آباد ہائی کورٹ دا فیصلا سُندے ای خشی دی لہر دوڑ پئی تے مبارکباد تے مٹھیائیاں ونڈن دا سلسلا شروع ہو گیا۔ایس حوالے نال گل بات کردے ہوئے پاکستان مسلم لیگ (ن) دے رہنما و سا بق وزیر داخلا احسن اقبال دا کہنا سی کہ نواز شریف دی سزا پری پول دھاندلی سی جیہدا مقصد اوہناں نوں انتخابی میدان توں باہر کڈھنا سی۔
نیب دا فیصلا انتقام اُتے مبنی سی۔ ایہ نان پی سی او انصاف دی اک جھلک اے۔ اوہناں دا کہنا سی کہ نیب دا اوہ فیصلا جو انتقام اُتے سی اوہ معطل ہویا اے، ایہ ٹرائل ایس لحاظ نال بہت اہم اے ۔ اوہناں نے آکھیا کہ عدالتی فیصلے اُتے پاکستانی لوکائی تے ملک بھر وچ مسلم لیگ (ن) دے کارکناں نوں مبارکباد دینا واں۔ رب سوہنے نے (ن) لیگ دے کارکناں دیاں دعاواں قبول کیتیاں نیں۔
