لاہور(پاکستان پوائنٹ نیوز18۔ستمبر۔2018ء) عمران خان دے نال نال اوہناں دا کتا وی ہیلی کاپٹر دے مزے لیندا اے۔ مشہور پرچا کار سلیم صافی دا اپنے کالم وچ کہنا سی کہ کے پی ہاؤس نتھیا گلی پہلیاں ساریاں حکومتاں دے مقابلے وچ زیادہ استعمال ہویا۔ ایہو حالت کے پی ہاؤس اسلام آباد دی وی رہی جیہدے خرچیاں دی تفصیل تے میں اپنے ٹی وی پروگرام وچ وی وکھا چُکا واں کہ کس طرحاں غیر متعلقہ لوک وی آکے صوبائی حکومت دے وسائل نوں استعمال کردے رہے تے کس طرحاں اک ویلے دی چاہ دے بل لکھاں وچ سرکاری خزانے توں دتے جاندے رہے۔
سلیم صافی دا کہنا سی کہ پر ہن وفاق تے صوبیاں وچ ایہناں ڈرامیاں نوں نویں انداز وچ دُہرایا جا رہیا اے۔ پہلے آکھیا گیا کہ وزیر اعظم ہاؤس وچ نہیں رہواں گے۔ ہن ایہ آکھیا جا رہیا اے کہ وزیر اعظم ملٹری سیکرٹری دے گھر وچ رہ رہے نیں حالانکہ اوہ اوسے وزیر اعظم ہاؤس اندر اے۔اوہناں دا کہنا سی کہ باقی خرچے اُنجے ای ہو رہے نیں جس طرحاں ماضی وچ ہوندے رہے۔
اک وادھو خرچہ ایہ آیا کہ وزیراعظم ملٹری سیکرٹری دے گھر نوں استعمال کردے رہے نیں تے ملٹری سیکرٹری پرنسپل سیکرٹری دے گھر منتقل ہوئے جدکہ پرنسپل سیکرٹری نے باہر اپنے لئی گئی لے لیا۔ انج اک بنگلا وادھو استعمال وچ آن لگا۔ سلیم صافی دا کہنا سی کہ ریاست مدینہ دا ورد کرن والے محترم عمران خان صاحب جدوں توں وزیر اعظم بنے نیں، بنی گالا توں بغیر ہیلی کاپٹر دے باہر نہیں نکلے ۔
بنی گالا تے وزیر اعظم ہاؤس وچکار ہیلی کاپٹر ا ورتیا جا رہیا اے تے اوہناں دے نال نال اوہناں دا کتا وی ہیلی کاپٹر دے مزے لے رہیا اے۔ سلیم صافی دا کہنا سی کہ جدوں وزیر اعظم بنی گالا توں ہیلی کاپٹر وچ بیٹھدے نیں تے اوہناں دا سکیورٹی سٹاف سڑک راہیں گڈیاں وچ وزیر اعظم ہاؤس ول دوڑن لگدا اے پر کتا وزیر اعظم نال ہیلی کاپٹر وچ بہ جاندا اے تے فیر جدوں اوہ وزیر اعظم ہاؤس توں بنی گالا آؤندے نیں، فیر دوبارہ کتا وزیر اعظم نال ہیلی کاپٹر وچ تشریف لے آؤندا اے۔
