کراچی(پاکستان پوائنٹ نیوز18۔ستمبر۔2018ء) بجٹ پیش ہون دے پہلے دن ای سٹاک ایکسچینج وچ زبردست تیزی ویکھی گئی ۔ سٹاک ایکسچینج100انڈیکس وچ 400پوائنٹس دا وادھاہویا۔ تفصیل مطابق قومی اسمبلی دا اجلاس اج سپیکر قومی اسمبلی اسد قیصر دی صدارت ہیٹھ ہویا۔ اجلاس وچ وفاقی کابینہ دے اجلاس وچ بجٹ ترامیم دی منظوری مگروں اوہنوں قومی اسمبلی وچ پیش کیتا گیا۔
ایس موقعے تے ایوان نال خطاب کردے ہوئے وزیر خزانہ اسد عمر نے آکھیا کہ بجٹ وچ تبدیلی نہ کیتی گئی تے اوکڑاں پیدا ہوسکدیاں نیں۔اوہناں نے لوکائی نوں مہنگائی دے طوفان توں خبردار کیتا۔ اوہناں دا کہنا سی کہ رُپئے دی قدر وچ لگاتار کمی آ رہی اے جیہدے مگروں زرمبادلا دے ذخائر تیزی نال ڈگ رہے نیں۔ اوہناں نے ہور دسیا کہ زرمبادلا دے ذخائر ڈگن نال لوکائی نوں مہنگائی دا ساہمنا کرنا پے سکدا اے۔
اوہناں دا کہنا سی کہ جے رُپئے دی قدر ایس طرحاں ڈِگدی رہی تے پٹرول دی قیمت 20رُپئے فی لیٹر ودھ سکدی اے۔ چیتے رہوے کہ ایس توں پہلاں وزیر اعظم عمران خان دی صدارت ہیٹھ وفاقی کابینہ دے اجلاس وچ بجٹ ترامیم دی منظوری دتی گئی۔ اجلاس وچ سپر ٹیکس سنے 158ارب رُپئے دے نویں ٹیکس لان دی تجویز پیش کیتی گئی۔ایس توں وکھ 450رُپئے دے ترقیاتی بجٹ وچ کمی دی تجویز وی دتی گئی۔
وسیلیاں مطابق کابینہ اجلاس وچ بجٹ کسارا 6.6فیصد گھٹ کرکے پنج فیصد تیکر لیان دی تجویز بارے غور کیتا گیا ۔ ایس توں وکھ ترقیاتی بجٹ وچ 725ارب رُپئے کمی تے نان فائلز بینکنگ نال لین دین اُتے ٹیکس دی شرح ودھان دا فیصلا کیتا گیا اے۔ کابینہ دے اجلاس وچ فیصلا کیتا گیا کہ حکومت 608ارب رُپئے تیکر اپنا خرچہ گھٹائے گی ۔ حکومتی اداریاں، وڈیاں عمارتاں تے وزیراں دے خرچیاں نوں گھٹ کیتا جائے گا۔دوجے پاسے بجٹ آن مگروں سٹاک ایکسچینج وچ تیزی ویکھن نوں آئی۔ایس موقعے تے خریداراں نے کُھل کے خریداری کیتی۔ جیہدے مگروں کراچی سٹاک ایکسچینج100انڈیکس وچ 400پوائنٹس دا وادھا ویکھن نوں ملیا۔
