اسلام آباد(پاکستان پوائنٹ نیوز18۔ستمبر۔2018ء) سپریم کورٹ نے حکم دتا اے کہ کالا باغ ڈیم لئی حکومت مشترکہ مفادات کونسل دے فیصلیاں اُتے عملدرآمد کروائے ،عالمی بنک تے بین الاقوامی ماہرین دی رپورٹ وچ وی پانی تے بجلی لئی کالا باغ ڈیم نوں ضروری قرار دتاگیا ، صوبے قومی مفاد وچ کالا باغ ڈیم دی مخالفت ختم کرن، نویں ڈیمز دی اُساری نال 6.17ملین ایکڑ فٹ پانی جمع کرن دی صلاحیت وچ وادھا ہوئے گا۔
میڈیا رپورٹس مطابق چیف جسٹس آف پاکستان جسٹس میاں ثاقب نثار نے پانی دی کمی بارے کیس دا تحریری حکم نامہ جار ی کر دتا اے۔ چیف جسٹس سپریم کورٹ نے 26صفحیاں اُتے مشتمل تحریری فیصلا آپ تیار کیتا۔ تحریری حکم مطابق عدالت نے آکھیا کہ دنیا دیاں ساریاں معیشتاں دا انحصار پانی اُتے اے۔ کُجھ ورھیاں توں گلیشئر تیزی نال پگھل رہیا اے۔ گلیشئر پگھلن دا عمل آؤندے ویلے نوں وی جاری رہوے گا۔
سپریم کورٹ نے آکھیا کہ پانی دی قلت تے مستقبل وچ لوڑاں اُتے سارے راضی نیں۔ ایس ویلے ملک وچ زندگی دی بقاء لئی پانی دی بہت ضرورت اے۔ پاکستان زرعی ملک اے جیہنوں مُکھ رکھدے ہوئے پانی دی بہت اہمیت اے۔ تحریری حکم وچ ہور آکھیا گیا کہ پانی ورتن دی قیمت لتی جائے تاں جے پانی دی ورتوں ذمے واری نال ہوئے۔ پانی ورتن دا تخمینہ لان لئی انڈس ریو اتھارٹی میٹر لائے جان۔
مینہ دا پانی جمع کر کے استعمال کرن دی حکمت عملی اختیار کیتاجائے ۔ اپنے حکم وچ سپریم کورٹ نے نے آکھیا کہ پانی دی کفایت شعاری نال ورتوں بارے آگاہی مہم چلائی جائے۔ دنیا وچ پانی جمع کرن والے ملکاں وچ پاکستان دی گنتی آخری نمبر اُتے اے۔ پاکستان وچ پانی دے وسائل دے تحفظ لئی اقدامات نہیں کیتے گئے۔دیامیر بھاشا ڈیم دی منظوری ای سی سی نے دتی اے۔
سپریم کورٹ دے فیصلے وچ ہور آکھیا گیا کہ ڈیماں دی اُساری نہ ہون دی وجہ توں ہر سال ہڑھ آؤندا اے۔ دیامیر بھاشا ڈیم دی لاگت 1139ارب اے۔ حکومت 86ارب رُپئے پہلے ای دے چکی اے۔ ایسے طرحاں ڈیم دی لاگت 309ارب رُپئے اے۔ بدقسمتی نال ایس ویلے 10توں 12ملین مکعب فٹ پانی جمع کیتا جا رہیا اے۔ 1956وچ کالا باغ ڈیم لئی فزیبلٹی رپورٹ تیار کیتی گئی جدکہ 1983وچ حتمی رپورٹ تیار کیتی گئی۔
رپورٹ دی تیاری لئی قومی و بین الاقومی ماہرین توں مدد لتی گئی۔مشترکہ مفادات کونسل نے 16ستمبر 1991نوں کالا باغ ڈیم بنان دا فیصلا کیتا۔ دوجا فیصلا 9مئی 1998نوں ہویا۔ مشترکہ مفادات کونسل دے فیصلیاں اُتے اج تیکر عمل نہیں ہویا۔ بلکہ کالا باغ ڈیم دی اُساری وچ اوکڑاں پائیاں گئیاں۔ کالا باغ ڈیم دی اُساری اُتے مخالفاں دے خدشے بلاوجہ نیں۔ صوبے قومی مفاد وچ کالا باغ ڈیم دی مخالفت ختم کرن۔ حکومت نیک نیتی نال مخالفاں دے خدشے دور کرے۔
