گیس دیاں قیمتاں وچ وادھا:شیخ رشید اپنی ای حکومت خلاف بول پئے

گیس دیاں قیمتاں ودھان نال روٹی دی قیمت وچ وادھا ہوئے گا،ُتُسیں جو مرضی آکھو لوکائی تہاڈیاں ایہناں تشریحات نوں قبول نہیں کرے گی:شیخ رشیددا تحریک انصاف دی پارلیمانی کمیٹی دے اجلاس وچ موقف

گیس دیاں قیمتاں وچ وادھا:شیخ رشید اپنی ای حکومت خلاف بول پئے
 گیس دیاں قیمتاں ودھان نال روٹی دی قیمت وچ وادھا ہوئے گا،ُتُسیں جو مرضی آکھو لوکائی تہاڈیاں ایہناں تشریحات نوں قبول نہیں کرے گی:شیخ رشیددا تحریک انصاف دی پارلیمانی کمیٹی دے اجلاس وچ موقف

اسلام آباد(پاکستان پوائنٹ نیوز18۔ستمبر۔2018ء) وفاقی وزیر ریلوے شیخ رشید نے گیس دیاں قیمتاں دے معاملے اُتے اپنی ای حکومت نال اختلاف ظاہر کرد تا۔ تحریک انصاف دی پارلیمانی کمیٹی دے اجلاس وچ شیخ رشید نے اپنا موقف دیندے ہوئے آکھیا کہ تُسیں جو مرضی آکھو لوکائی تہاڈیاں ایہناں تشریحات نوں قبول نہیں کرے گی۔تفصیل مطابق تحریک انصاف دی پارلیمانی کمیٹی دے اجلاس دی اندرونی کہانی ساہمنے آ گئی اے۔

گیس دیاں قیمتاں ودھان دے معاملے اُتے سارے وزیر چُپ رہے پر شیخ رشید اکلے ای ساری کابینہ ساہمنے کھلو گئے۔ اوہناں دا کہنا سی کہ گیس دیاں قیمتاں نہ ودھائیاں جان ۔ گیس دیاں قیمتاں ودھان نال روٹی دی قیمت وچ وادھا ہوئے گا تے گیس نال بنن والیاں شیواں مہنگیاں ہون گیاں۔ وزیر ریلوے دا کہنا سی کہ تُسیں جو مرضی آکھو لوکائی تہاڈیاں ایہناں تشریحات نوں قبول نہیں کرے گی۔

ایس لئی ایہناں فیصلیاں توں پرہیز کرو، جیہدے نال حکومت دی مقبولیت گھٹے۔ چیتے رہوے کہ پاکستان تحریک انصاف دی حکومت نے پچھلے دیہاڑے گیس دیاں قیمتاں ودھان دا اعلان کیتا سی۔ وفاقی وزیر پٹرولیم چودھری غلام سرور نے میڈیا نال گل بات کردے ہوئے آکھیا سی کہ 2013وچ گیس کمپنیاں منافعے اُتے چل رہیاں سن۔ 2018 وچ گیس کمپنیاں نوں 152ارب رُپئے کسارے(خسارے)دا ساہمنا اے۔

گیس نیٹ ورک اُتے پورے پاکستان وچ 23فیصد لوک نیں۔ اوہناں نے آکھیا کہ ایکسپورٹ کمپنی نوں گیس دیاں قیمتاں وچ وادھا کر کے ریلیف دتا اے۔ چودھری غلام سرور نے آکھیا کہ گیس بلاں وچ مجموعی طور اُتے 20توں 25فیصد وادھا کیتا گیا اے۔ عام بندے لئی گیس وچ 10توں 15رُپئے وادھا کیتا گیا۔ اوہناں دا کہنا سی کہ 100کیوبک میٹر والے دا بل 480رُپئے سی جو ہن 551رُپئے ہوئے گا۔

عام بندے لئی 23مہینے وچ وادھا ہوئے گا۔ ایسے طرحاں 50کیوبک میٹر گیس ورتن اُتے بل 252سی جو ہن ودھ کہ 275ہو جائے گا۔ اوہناں نے آکھیا کہ اک ہزار 900رُپئے گیس دا بل دین والا 2ہزار توں ودھ بل دیوے گا۔ چودھری غلام سرور نے آکھیا کہ ایل پی جی اُتے سارے ٹیکس ختم کر کے 10فیصد جی ایس ٹی لایا اے۔ ایل پی جی دی قیمت 1600توں گھٹ ہو کے 1400سو رُپئے ہو جائے گی۔ پاکستان دی 60فیصد آبادی ایل پی جی ورتدی اے۔