اسلام آباد(پاکستان پوائنٹ نیوز17۔ستمبر۔2018ء) زندہ قوماں مسائل توں گھبرایا نہیں کردیاں، انصا ف تے عدل دے نظام والا ای پاکستان قائداعظم چاہندے سن،دہشت گردی دا خاتمہ فوج دا کریڈٹ اے، نویں حکومت نوں چاہیدا سوشل کنٹریکٹ نوں لاگو کرے، اسلامی معاشرے دی بنیاد وی بھائی چارے اُتے رکھی گئی اے۔تفصیل مطابق اج صدر مملکت عارف علوی نے صدر منتخب ہون مگروں پارلیمنٹ نال اپنا پہلا خطاب کیتا ۔
اپنے خطاب وچ اوہناں دا کہنا سی کہ پارلیمنٹ دیاں راہ داریاں توں پہلے ای جانو آں ۔ میں ایتھے جو کر سکدا سی میں اوہ ذمے واریاں نبھائیاں۔ میں پاکستان دیاں ساریاں اسمبلیاں دا مشکور آں کہ مینوں پاکستان دے سبھ توں وڈے عہدے لئی قابل سمجھیا۔اوہناں دا کہنا سی کہ مینوں پوری آس اے کہ سارے ارکان پارلیمنٹ میرا ساتھ دین گے تاں جے اسیں لوکائی ساہمنے سرخرو ہو سکیے۔
ساڈیاں تن اسمبلیاں اپنی مدت پوری کرن وچ کامیاب رہیاں۔ لوکائی بے ایمانی توں پاک معاشرہ چاہندی اے۔ ڈاکٹر عارف علوی نے آکھیا کہ کرپشن دے خاتمے لئی احتساب اداریاں نوں مضبوط کرن دی ضرور ت اے۔ چالو حکومت نے نواں پاکستان بنان دا عزم کیتا اے۔ اوہدی مثال سادگی دا فروغ، غیر ضروری پروٹوکول دا خاتمہ تے کفایت شعاری اے۔اوہناں دا کہنا سی کہ پچھلے کئی ورھیاں توں اسیں اپنے بنائے قانوناں دی خلاف ورزی کر رہے آں۔
سانوں اپنیاں زندگیاں وچ سادگی نوں اپنانا پئے گا۔ انج دے قانون اپنا کے اسیں اگانہ ودھ سکدے آں۔ ساڈے ساہمنے مدینہ دی ریاست دا ماڈل اے۔ اسلامی معاشرے دی بنیاد وی بھائی چارے اُتے رکھی گئی اے۔ اوہناں نے آکھیا کہ انصا ف و عدل دے نظام والا ای پاکستان قائداعظم چاہندے سن۔ سارے لوکاں نوں تعلیم و صحت تے رہائشی پروگراماں وچ برابر دے حق حاصل ہونے چاہیدے۔
اوہناں د اکہنا سی کہ چالو حکومت نے وی ایہو اصولاں دے تحت کم شروع کر دتا اے۔ جے اسیں ایہدے وچ کامیاب ہو گئے تے ایہو نواں پاکستان ہوئے گا۔نویں پاکستان وچ سِر چُک کے ٹُر سکاں گے۔ اوہناں نے آکھیا کہ قوماں مسائل نال دو چار ہو جایا کردیاں نیں پر زندہ قوماں گھبرایا نہیں کردیاں۔ اوہناں نے آکھیا کہ فوج دا سپاہی، قلم کار، کسان، عدالتاں دے نمائندے سارے لوک پاکستان دی اُساری وچ حصہ پا رہے نیں۔
میں حکومت توں درخاست کرنا واں کہ عوامی آساں دے مطابق حکومتی سمت نوں ٹھیک کیتا جائے۔ مینوں یقین اے کہ حکومت گڈ گورننس نوں ٹھیک کرے گا۔عارف علوی نے آکھیا کہ پاکستان دی گنتی اجیہے ملکاں وچ ہوندی اے جتھے پانی دی کمی اے۔ پانی دی کمی اُتے قابو پان لئی نویں دیمز تے موسمیاتی تبدیلیاں لئی شجر کاری کرنی پئے گی۔ سانوں پانی دے ضیاع نوں روکن اُتے توجہ دینی پئے گی۔ اوہناں نے آکھیا کہ ملک بھر وچ بجلی دے نظام نوں مربوط شکل وچ لیانا پئے گا۔ بجلی پیدا کرن دے ہور منصوبے لائے جان گے۔ جتھے وی بجلی پیدا ہوئے اوہنوں نیشنل گریڈ سسٹم وچ شامل کرنا پئے گا۔
