اسلام آباد(پاکستان پوائنٹ نیوز17۔ستمبر۔2018ء) نواز شریف دیسی مرغی تے مٹن کھاندے سن پر عمران خان کُجھ نہیں کھاندے،وزیر اعظم عمران خان گھر جا کے رات دا کھانا کھاندے نیں۔تفصیل مطابق اینے وڈے رقبے اُتے بنے وزیر اعظم ہاؤس نوں اندروں ویکھ کے لوک ہکے بکے رہ گئے۔لوکاں دا کہنا اے کہ وزیر اعظم ہاؤس نوں اندروں ویکھ کے پتا چلدا اے کہ لوکائی دے پیسے اُتے کیویں سابق حکمراناں نے موجاں کیتیاں۔
وزیر اعظم ہاؤس وچ جتھے ڈرائنگ روم، ڈائنگ روم، کانفرنس روم تے بیڈ روم ویکھ کے اکھاں کُھلیاں رہ گئیاں اوتھے وزیر اعظم ہاؤس دا کچن وی کسے توں گھٹ نہیں اے۔ میڈیا رپورٹ مطابق 1992وچ بنن والے وزیراعظم ہاؤس دے پہلے مکین میاں نواز شریف سن۔ اوہناں مگروں محترمہ بے نظیر بھٹو نویں وزیر اعظم ہاؤس وچ آئیاں۔ پرویز مشرف نے وزیراعظم ہاؤس نوں اپنا کیمپ آفس بنایا۔
بعدوں شوکت عزیز، چودھری شجاعت حسین، یوسف رضا گیلانی تے راجا پرویز اشرف وزیر اعظم ہاؤس مکین بنے۔ آخری وار سابق وزیر اعظم نواز شریف ای ایتھوں گئے۔ ہن کیونکہ عمران خان نے ایس وزیراعظم ہاؤس وچ رہن توں انکار کیتا اے تے سابق وزیر اعظم وزیر اعظم نواز شریف نوں ای وزیر اعظم ہاؤس دے آخری مکین ہون دا اعزاز حاصل اے۔ وزیراعظم ہاؤس دا اک کمرہ جو کہ ڈپٹی ملٹری سیکرٹری دا سی، (ن) لیگ دے دور وچ مریم نواز دا میڈیا سیل بنیا رہیا جو کہ ہن خالی اے۔ پر وسیلیاں مطابق نواز شریف وزیر اعظم ہاؤس وچ دیسی مرغی تے مٹن کھاندے سن پر عمران خان کُجھ نہیں کھاندے۔وسیلیاں دا کہنا اے کہ وزیر اعظم عمران خان گھر جا کے رات دا کھانا کھاندے نیں۔
