اسلام آباد(پاکستان پوائنٹ نیوز17۔ستمبر۔2018ء) سماجی رابطے دی ویب سائٹ ٹویٹر اُتے صدر مملکت ڈاکٹر عارف علوی دی بیوی دے پروٹوکول لین دی ویڈیو وائرل ہوئی۔ تفصیل مطابق سماجی رابطے دی ویب سائٹ ٹویٹر اُتے صدر مملکت ڈاکٹر عارف علوی دی بیوی دے پروٹوکول لین دی ویڈیو وائرل ہوئی اے۔ویڈیو وچ ویکھیا جا سکدا اے کہ عارف علوی دی گھر والی ائر پورٹ توں نکلدے ای لائن وچ لگیاں گڈیاں ول اگانہ ودھدیاں نیں تے اوہناں وچوں اک گڈی اندر بہ جاندیاں نیں۔ ویڈیو بنان والے بندے نوں ائر پورٹ اُتے موجود سکیورٹی گارڈ نے ویڈیو بنان توں منع کیتا پر ویڈیو بنان والے نے مزاحمت مگروں وی صدر مملکت دی گھر والی لئی لگے روٹ دا منظر وکھایا۔ ویڈیو وچ ویکھیا جا سکدا اے کہ صدر مملکت عارف علوی دی گھر والی لئی ائر پورٹ اُتے شاہانہ پروٹوکول تے سکیورٹی دا انتظام کیتا گیا۔ ویڈیو وچ صدر مملکت عارف علوی دی گھر والی دا مونہہ نظر نہیں آیا۔
دوجے پاسے ٹویٹر ورتیندڑاں نے ویڈیو اُتے وفاقی حکومت نوں تنقید دا نشانہ بنانا شروع کر دتا اے۔ یاد رہوے کہ ایس توں پہلاں عارف علوی دے وی کراچی دے دورے دوران دو درجن توں ودھ گڈیاں دا پروٹوکول لین دے چرچے ہوئے سن جیہدے اُتے عارف علوی نے آکھیا کہ میں پروٹوکول لین توں انکار کیتا سی پر میرے منع کرن مگروں وی مینوں پروٹوکول دتا گیا۔
