لاہور(پاکستان پوائنٹ نیوز14۔ستمبر۔2018ء) شریف خاندان نوں اوکڑاں وچوں کڈھن دی دعویدار سوانی ساہمنے آ گئی۔ سوانی دا دعوا اے کہ شریف خاندان نوں جے کوئی اوکڑاں وچوں کڈھ سکدا اے تے اوہ میں آں۔ تفصیل مطابق ایہدے وچ کوئی شک نہیں اے کہ شریف خاندان ایس ویلے نازک ترین دور توں لنگھ رہیا اے تے حالات دا اندازہ ایتھوں لایا جا سکدا اے سابق وزیر اعظم نواز شریف تے مریم نواز نوں عدالت ولوں قید دی سزا سُنائی گئی اے، حسن تے حسین نواز نوں اشتہاری قرار دتا گیا اے جدکہ شہباز شریف وی اقتدار توں ہتھ دھو بیہن مگروں اوکڑاں دا شکار نیں۔
ہور تے ہور بیگم کلثوم نواز دی وفات نے حالات نوں ہور دُکھی کر دتا اے۔ ایہناں حالات وچ اک اجیہی سوانی ساہمنے آ گئی اے جیہنے ایہ دعوا کیتا اے کہ شریف خاندان دی ساریاں اوکڑاں دا حل صرف اوہدے کول اے۔ ایہ سوانی بیگم کلثوم نواز دیاں آخری رسماں وچ رلتی ہوئی سی۔ سوانی دا دعوا سی کہ دنیا وچ جے شریف خاندان نوں کوئی اوکڑاں وچوں کڈھ سکدا اے اوہ میں آں۔ سوانی دا کہنا سی کہ جے شریف خاندان میرے نال رابطہ کرے تے 101فیصد ایہ لوک اوکڑاں وچوں نکل سکدے نیں۔ سوانی کولوں جدوں پُچھیا گیا کہ اوہ روحانی شخصیت اے یاں جادوگرنی ؟جواب وچ سوانی نے آکھیا کہ اوہ وڈے وڈے دعوے نہیں کردی پر بس نماز تے قرآن پڑھدی اے تے اوہدے نال لوکاں دے مسئلے حل کردی اے۔
