2سال بعد تنخاہ دار طبقے نوں چوکھی تنخاہ دیواں گے:عمران خان

مینوں صرف کم چاہیدا، کدی پاکستان نوں اینے چیلنجز نہیں سن جِنے اج نیں، قرضیاں اُتے ہر روز 6ارب رُپئے سود دے رہے آں، جے اپنے آپ نوں نہیں بدلاں گے تے ترقی نہیں کراں گے :سرکاری ملازماں نال خطاب

2سال بعد تنخاہ دار طبقے نوں چوکھی تنخاہ دیواں گے:عمران خان
 مینوں صرف کم چاہیدا، کدی پاکستان نوں اینے چیلنجز نہیں سن جِنے اج نیں، قرضیاں اُتے ہر روز 6ارب رُپئے سود دے رہے آں، جے اپنے آپ نوں نہیں بدلاں گے تے ترقی نہیں کراں گے :سرکاری ملازماں نال خطاب

اسلام آباد(پاکستان پوائنٹ نیوز14۔ستمبر۔2018ء) وزیر اعظم عمران خان نے اسلام آباد وچ سرکاری ملازماں نال خطاب کیتا۔ سرکاری ملازماں نال خطاب کردے ہوئے عمران خان دا کہنا سی کہ مینوں صرف کم چاہیدا۔ کدی پاکستان نوں اینے چیلنجز نہیں سن جِنے اج نیں۔ قرضیاں اُتے ہر روز 6ارب رُپئے سود دے رہے آں۔اوہناں دا کہنا سی کہ پاکستان اُتے 30ہزار ارب دا قرضہ اے جے اپنے آپ نوں نہیں بدلاں گے تے ترقی نہیں کراں گے ، سیاستداناں، لوکائی تے بیوروکریسی نے اپنے آپ نوں بدلنا اے۔

اوہناں نے آکھیا کہ کوئی شے دنیا وچ ناممکن نہیں اے۔ جدوں توں ملک آزاد ہویا اے حکمران طبقے دا مائنڈ سیٹ ای نہیں بدلیا۔ گوریاں نے ہندوستان دے پیسیاں نال شاہانہ زندگی لنگھائی۔عمران خان دا کہنا سی کہ ساڈے حکمران طبقے نے وی لوکائی دے پیسے اُتے عیاشی دی گورے دی روایت نوں اپنایا۔ آزادی مگروں حکومت تے لوکائی نوں اک ہونا چاہیدا سی، پر نہیں ہوئے۔

اوہناں دا کہنا سی کہ سانوں انگریز دور دی سوچ نوں بدلنا پئے گا، ایتھے جس طرحاں خرچہ حکمران طبقہ کر رہیا کیتے نہیں ہوندا۔ جو اپنے آپ نوں نہیں بدلدا رب اوہدی حالت نہیں بدلدا۔عمران خان نے آکھیا کہ اسیں اج تیکر پاکستان وچ انگریزاں دے نظام نوں ای نہیں بدلیا۔ سارا مسئلا کرپشن دا اے۔ اداریاں وچ وڈی پدھر اُتے کرپشن اے۔ اورنج تے میٹرو ٹرین منصوبیاں اُتے قرضے لے کے اوہدے اُتے سود وی دے رہے آں۔

اوہناں دا کہنا سی کہ ناممکن نوں ممکن بنان لئی انسان نوں اپنا آپ بدلنا پیندا اے۔ قرضیاں اُتے ہر روز6ارب رُپئے سود دے رہے آں۔ عمران خان نے آکھیا کہ سرکاری افسر جدوں تیکر پالیسی اُتے عملدرآمد نہیں کران گے ، اسیں کامیاب نہیں ہوسکدے ۔عمران خان نے آکھیا کہ پاکستان دی 20ارب ڈالر تے سنگاپور دی 330ارب ڈالر دی ایکسپورٹ اے۔عمران خان دا خطاب دوران کہنا سی کہ بیوروکریسی دیاں شکایتاں آئیاں نیں ایہدے اُتے چیئرمین نیب نال گل کیتی۔اوہناں دا کہنا سی کہ 2سال بعد تنخاہ دار طبقے نوں چوکھی تنخاہ دیواں گے۔