کراچی(پاکستان پوائنٹ نیوز13۔ستمبر۔2018ء) ایم کیو ایم دے مرکزی رہنما فاروق ستار بہادر آبادگروپ توں وکھ ہو گئے، فاروق ستار نے رابطہ کمیٹی دی رکنیت توں استعفا دے دتا اے۔ اوہناں نے آکھیا کہ رابطہ کمیٹی دی رکنیت توں استعفا ذاتی وجہ توں دتا اے۔ میڈیا رپورٹس مطابق ایم کیو ایم دے مرکزی رہنما فاروق ستار نے بطور رکن کمیٹی کم کرن توں انکار کر دتا اے۔
فاروق ستار نے استعفا رابطہ کمیٹی ایم کیو ایم نوں گھل دتا اے۔چیتے رہوے کہ کُجھ دن پہلاں الیکشن کمیشن دے دفتر باہر میڈیا نال گل بات کردے ہوئے ڈاکٹر فاروق ستار نے آکھیا کہ پی ٹی آئی چاہندی اے کہ عارف علوی دے صدر چُنے جان مگروں این اے 247 دی خالی ہون والی سیٹ توں ضمنی الیکشن وچ حصہ لواں۔ فاروق ستار نے آکھیاکہ پی ٹی آئی دے کُجھ ارکان نے پارٹی وچ رلتی ہون دی دعوت دتی اے جیہدے بارے قریبی بیلیاں نال صلاح کر رہیا واں۔ جیہدے مگروں آکھیا جا رہیا اے کہ شاید فاروق ستار ایم کیو ایم پاکستان چھڈ کے پی ٹی آئی وچ رلتی ہون والے نیں۔
