پہلی وار پاک فوج نوں سرکاری ٹی وی چینل دا باقاعدہ حصہ بنا دتا گیا

وفاقی حکومت نے پی ٹی وی لئی 8رکنی بورڈ آف گورنر بنا دتا، ڈی جی آئی ایس پی آر وی حصہ ہون گے

پہلی وار پاک فوج نوں سرکاری ٹی وی چینل دا باقاعدہ حصہ بنا دتا گیا
وفاقی حکومت نے پی ٹی وی لئی 8رکنی بورڈ آف گورنر بنا دتا، ڈی جی آئی ایس پی آر وی حصہ ہون گے

اسلام آباد(پاکستان پوائنٹ نیوز13۔ستمبر۔2018ء) پہلی وار پاک فوج نوں سرکاری ٹی وی چینل دا باقاعدہ حصہ بنا دتا گیا، وفاقی حکومت نے پی ٹی وی لئی 8رکنی بورڈ آف گورنر بنا دتا، ڈی جی آئی ایس پی آر وی حصہ ہون گے۔ تفصیل مطابق وفاقی وزیر اطلاعات فواد چودھری نے وفاقی کابینہ دے اجلاس مگروں پریس کانفرنس کردے ہوئے آکھیا کہ اجلاس وچ بیگم کلثوم نواز لئی مغفرت دی دعا کیتی گئی۔

فواد چودھری نے دسیا کہ پی ٹی وی دے بورڈ آف گورنر دی منظوری دے دتی گئی اے۔ بورڈ آف گورنر دے چیئرمین نوں وزیر دی حیثیت حاصل ہوئے گی۔ پی ٹی وی بورڈ دے 8ارکان ہون گے۔ بورڈز آف گورنر وچ پہلی وار پاک فوج نوں وی شامل کیتا گیا اے۔ پی ٹی وی دے بورڈ آف گورنر وچ ڈی جی آئی ایس پی آر وی رکن ہون گے۔اوہناں نے ہور آکھیا کہ گیس دی کمی نال یوریا کھاد دی پیداوار رُک گئی اے۔

کھاد دی کمی نوں پورا کرن لئی اک لکھ ٹن یوریا کھاد سانوں درآمد کرنی پئے گی۔ اوہناں دا کہنا سی کہ پندرھاں ستمبر تیکر اپنے پلانٹس نوں پوری گیس دتی جائے تاں جے کمی پوری کیتی جا سکے۔ ایس توں وکھ وفاقی وزیر اطلاعات و نشریات فواد چودھری نے پریس کانفرنس دوران تنخاہ دار طبقے اُتے ٹیکس لان دیاں خبراں نوں رد کیتا۔اوہناں نے آکھیا کہ تنخاہ دار طبقے اُتے کسے قسم دا ٹیکس نہیں لایا گیا۔

چیتے رہوے کہ ایس توں پہلاں تنخاہ دار طبقے اُتے ٹیکساں دا بھار پان دیاں خبراں ساہمنے آئیاں سن۔ جیہدے مگروں تنخاہ دار طبقے ولوں پریشانی دا وکھالا کیتا جا رہیا سی۔ میڈیا اُتے آن والیاں خبراں وچ آکھیا گیا سی کہ وفاقی حکومت نے فنانس ایکٹ2018دے انکم ٹیکس آرڈیننس وچ ترامیم کر دتی اے۔حکومت ولوں کیتی جان والی ترمیم دا اثر تنخاہ دار طبقے اُتے پئے گا۔

ترامیم مگروں ہن تنخاہ دار طبقے نوں دتی گئی رعایت گھٹ گئی اے۔ حکومتی ترامیم مطابق چار لکھ رُپئے تیکر سالہوار آمدن اُتے کوئی ٹیکس نہیں ہوئے گا ۔چار لکھ توں 8لکھ رُپئے سالہوار آمدن اُتے اک ہزار رُپئے ٹیکس ہوئے گا۔ جدکہ 4لکھ توں 8لکھ اُتے اک ہزار تے 48لکھ توں ودھ آمدن اُتے3لکھ فکسڈ ٹیکس تے وادھو 15فیصد دینا پئے گا۔ایسے طرحاں 12لکھ رُپئے توں 24لکھ رُپئے تیکر سالہوار آمدن اُتے 5فیصد انکم ٹیکس ہوئے گا۔ 24لکھ توں ودھ تے 48لکھ رُپئے توں گھٹ رقم اُتے 10فیصد وادھو ٹیکس دینا پئے گا۔ ایسے طرحاں انج دے بندے جیہناں دی آمدن 24لکھ رُپئے توں ودھ اے اوہناں نوں سالہوار آمدن اُتے تن لکھ فکسڈ ٹیکس تے وادھو 15فیصد دینا پئے گا۔