واشنگٹن(پاکستان پوائنٹ نیوز13۔ستمبر۔2018ء) امریکا دی قومی سلامتی دے مشیر جان بلٹن نے آکھیا اے کہ امریکا ولوں پاکستان دی فوجی امداد روکن دا فیصلا معمولی نہیں سی کیونکہ ٹرمپ انتظامیہ نوں چنگی طرحاں پتا سی کہ اک ایٹمی طاقت رکھن والے خلاف ایکشن لین نال ممکنہ طور اُتے کیہ اثر پے سکدا اے۔ میڈیا رپورٹس مطابق امریکی تھنک ٹینک فیڈرلسٹ سوسائٹی فار لا ء اینڈ پبلک پالیسی سٹیڈیز دے اجلاس نال خطاب کردے ہوئے امریکا دی قومی سلامتی دے مشیر جان بلٹن دا کہنا سی کہ امریکا، پاکستان نال دہشت گردی خلاف جنگ وچ بھرپور تعاون چاہندا اے ۔
حقیقت تے ایہ اے کہ امریکا لئی ایہ بہت ضروری اے۔ اوہناں نے آکھیا کہ میرے آن توں پہلے، ٹرمپ انتظامیہ نے پاکستان دی فوجی امداد دے وڈے حصے نوں ختم کرن د افیصلا نہیں کیتا سی۔ اوہناں دا کہنا سی کہ ٹرمپ انتظامیہ نوں چنگی طرحاں پتا سی کہ پاکستان اک ایٹمی طاقت اے تے ایہ ڈر سی کہ حکومت دہشت گرداں دے ہتھوں یرغمال نہ بن جائے تے اوہ ایٹمی ہتھیاراں اُتے کنٹرول نہ حاصل کر لین۔ امریکی قومی سلامتی دے مشیر جان بلٹن نے دسیا کہ دہشت گردی پورے خطے لئی خطرناک مسئلا اے پر پاکستان نوں دہشت گرداں خلاف بھرپور کارروائی کرن دی ضرورت اے کیونکہ ایہ دہشت گردی آپ پاکستان لئی خطرہ اے۔
