اسلام آباد(پاکستان پوائنٹ نیوز13۔ستمبر۔2018ء) وفاقی حکومت نے وزیر اعظم ہاؤس نوں اُچے درجے دا تعلیمی ادارہ بنان دا اعلان کر دتا۔ تفصیل مطابق وفاقی وزیر تعلیم شفقت محمود نے پریس کانفرنس نال خطاب کردے ہوئے آکھیا کہ حکومت نے فیصلا کیتا اے کہ وزیراعظم ہاؤس نوں پوسٹ گریجویٹ پڑھیاراں لئی اک اُچے درجے دا تعلیمی ادارہ بنائے جائے گا۔ وزیر اعظم ہاؤس اک ہزار 96کینال دا اے، جیہدے اُتے سالہوار(سالانہ) 47کروڑ رُپئے خرچا آؤند ا اے۔
ایس لئی اوہنوں اُچے درجے دا تعلیمی ادارہ بنان دا اعلان کیتا گیا اے۔اوہناں دا کہنا سی کہ وزیر اعظم ہاؤس نوں تعلیمی ادارہ بنان لئی وزیر اعظم ہاؤس پچھے موجود زمین اُتے اُساری(تعمیرات) ہوئے گی۔ اوہناں نے آکھیا کہ ہائر ایجوکیشن کمیشن دے چیئرمین ڈاکٹر طارق تے ڈاکٹر عطاء الرحمان رلکے ایہدا پلان تجویز کرن گے، جیہدے مگروں وزیر اعظم ہاؤس نوں اُچے درجے دا تعلیمی ادارہ یاں یونیورسٹی بنایا جائے گا۔
تے ایہ ادارہ تعلیمی لحاظ نال وکھرا ہوئے گا۔ شفقت محمود نے آکھیا کہ ایس سلسلے وچ گورنر ہاؤس مری بارے وی غور کیتا گیا، گورنر ہاؤس مری اُتے پنجاب نے حکومت نے کُجھ مہینے پہلاں ای 60کروڑ رُپئے لایا۔ پنجاب ہاؤس مری 30کینال دا اے ایہدے وچ 40کمرے نیں جیہدے اُتے کوئی سالہوار ڈھائی کروڑ خرچ آ رہیا اے۔ ایس حوالے نال فیصلا کیتا گیا کہ اک سیاحتی ریزورٹ (ٹورسٹ کمپلیکس) بنایا جائے گا۔ ایس سلسلے وچ پنجاب حکومت ساریاں قانونی شیواں دا جائزہ لے لوے گی جیہدے مگروں اوہنوں سیاحتی ریزورٹ بنان لئی کم شروع کر دتا جائے گا۔
