اسلام آباد(پاکستان پوائنٹ نیوز12۔ستمبر۔2018ء) سابق وزیر اعظم نواز شریف دی دھی مریم نواز دا کہنا اے کہ بُہت دُکھی آں،والدہ دے آخری ویلے اوہناں نال نہیں ساں۔ میڈیا رپورٹس وچ دسیا گیا اے کہ اپنی والدہ بیگم کلثوم نواز دے انتقال مگروں پیرول اُتے رہائی دے بعد جاتی امراء روانگی ویلے ائر پورٹ اُتے میڈیا نال گل بات دوران والدہ داذکر کردیاں مریم نواز رُو پئیاں۔
اوہناں دا کہنا سی کہ میں بہت دُکھی آں۔ میں والدہ دے آخری ویلے اوہناں نال نہیں سای۔ اوہناں نے قوم توں اپیل کردے ہوئے آکھیا کہ والدہ دے درجات دی بلندی لئی دعا کرو۔چیتے رہوے کہ اج پنجاب حکومت نے سابق وزیر اعظم میاں نواز شریف دی گھر والی بیگم کلثوم نواز دے جنازے وچ رلت لئی سابق وزیر اعظم نواز شریف، اوہناں دی دھی مریم نواز تے داماد کیپٹن (ر) صفدر نوں پیرول اُتے رہا کر دتا اے، جیہدے مگروں اوہ جاتی امراء رائے ونڈ لاہور چلے گئے۔ ایس دوران جاتی امراء رہائش گاہ نوں سب جیل دا درجہ حاصل رہوے گا۔
