اسلام آباد(پاکستان پوائنٹ نیوز12۔ستمبر۔2018ء) پنجاب حکومت نے سابق وزیر اعظم میاں نواز شریف دی گھر والی بیگم کلثوم نواز دے جنازے وچ رلت لئی سابق وزیر اعظم نواز شریف، اوہناں دی دھی مریم نواز تے داماد کیپٹن (ر) صفدر نوں پیرول اُتے رہا کر دتا اے، جیہدے مگروں اوہ جاتی امراء رائے ونڈ لاہور چلے گئے۔ ایس دوران جاتی امراء رہائش گاہ نوں سب جیل دا درجہ حاصل رہوے گا۔
چیتے رہوے کہ سابق وزیر اعلا شہباز شریف نے پنجاب حکومت نوں نواز شریف، مریم نواز تے کیپٹن (ر) صفدر دی پیرول اُتے 5دن لئی رہائی دی درخاست دتی سی۔ درخاست اُتے نواز شریف، مریم نواز تے کیپٹن (ر) صفدر نوں 12گھنٹیاں لئی پیرول اُتے رہائی دتی گئی اے۔ نوٹی فکیشن جاری ہون مگروں تِناں قیدیاں نوں اڈیالا جیل توں رہا کر دتا گیا اے تے اوہ اُچیچے جہاز راہیں لاہور اپڑے۔نوٹی فکیشن مطابق تِناں قیدیاں دا اڈیالا جیل توں جاتی امراء تیکر دا سفر پیرول وچ شامل نہیں ہوئے گا۔ ایس توں وکھ محکمہ داخلا پنجاب نے جاتی امراء نوں سب جیل قرار دیندے ہوئے جیل عملے نوں تعینات کر دتا اے۔
