لاہور(پاکستان پوائنٹ نیوز11۔ستمبر۔2018ء) مسلم لیگ (ن) دے صدر شہباز شریف نے آکھیا اے کہ کلثوم نواز دی وفات نال اک عہد دا خاتمہ ہوگیا، مسلم لیگ (ن) تے جمہوریت وی کلثوم نواز دی قرض دار رہوے گی، نواز شریف ہر اوکھے ویلے وچ اوہناں نال صلاح کردے سن، اوہناں نے ماں ، دھی تے بھین دا مثالی کردار نبھایا۔ اوہناں نے اپنی بھرجائی دی وفات اُتے دُکھ دا اظہار کردے ہوئے آکھیا کہ محترمہ کلثوم نواز دی وفات بہت وڈا صدمہ اے۔
شہباز شریف دا کہنا سی کہ کلثوم نواز دی وفات نال اک عہد دا خاتمہ ہو گیا اے۔ اوہناں نے آکھیا کہ مسلم لیگ (ن) تے جمہوریت وی کلثوم نواز دی قرض دار رہوے گی۔ اوہناں نے ماں ، دھی تے بھین دا مثالی کردار نبھایا۔یاد رہوے کہ اج سابق خاتون اول لما چِر بیمار رہن مگروں رب سوہنے نوں پیاریاں ہو گئیاں نیں۔ جیہدے مگروں شریف خاندان سنے مسلم لیگ (ن) دے چاہن والے غم دی کیفیت وچ ڈُب گئے نیں۔ پاکستان دے ہر شہری ولوں بیگم کلثوم نواز دی وفات اُتے ڈاڈھے دُکھ دا اظہار کیتا جا رہیا اے۔ دوجے پاسے حکومت نے وی وڈا فیصلا کردے ہوئے تن دن لئی ہر قسم دیاں سرکاری تقریباں منسوخ کر دتیاں نیں۔
