لاہور(پاکستان پوائنٹ نیوز11۔ستمبر۔2018ء) بیگم کلثوم نواز دیاں آخری رسماں دے موقعے اُتے حکومت نے نواز شریف، مریم نواز تے کیپٹن (ر) صفدر نوں پیرول اُتے رہائی دین دا اشارہ دے دتا ۔ تفصیل مطابق بیگم کلثوم نواز اج دوپہرے چلانا کر گئیاں۔ بیگم کلثوم نواز دے شوہر نواز شریف، دھی مریم نواز تے داماد کیپٹن (ر) صفدر نوں جیل حکام ولوں بیگم کلثوم نواز دے چلانا کرن بارے نہیں دسیاگیا سی۔
بلکہ نواز شریف نوں اپنی گھر والی دے فوت ہون دی خبر سرکاری ٹی وی توں پتا لگی۔دوجے پاسے بیگم کلثوم نواز دی میت جمعے دے دیہاڑے پاکستان لیائے جان دی آس اے۔ کلثوم نواز نوں جاتی امراء وچ دفن کیتا جائے گا۔ ایس حوالے نال حکومت نے نواز شریف، مریم نواز تے کیپٹن (ر) صفدر نوں پیرول رہائی دی قانونی سہولت دین دا فیصلا کر لیا۔پنجاب حکومت دا کہنا اے کہ جے درخاست کیتی گئی تے بیگم کلثوم نواز دیاں آخری رسماں لئی شریف خاندان نوں پیرول اُتے رہائی دتی جائے گی۔
وزیراعظم عمران خان نے ایس توں پہلے ای اشارہ دے دتا اے کہ بیگم کلثوم نواز دیاں آخری رسماں لئی شریف خاندان نوں ساریاں قانونی سہولتاں دتیاں جان گیاں۔یاد رہوے کہ پیرول رہائی اک قانونی سہولت اے، جو قیدیاں نوں کئی موقعیاں اُتے دتی جاندی اے جیوں کہ ویاہ شادی یاں کسے عزیز دے فوت جان اُتے۔
