اسلام آباد(پاکستان پوائنٹ نیوز10۔ستمبر۔2018ء) چیف جسٹس سپریم کورٹ جسٹس میاں ثاقب نثار نال چیف آف آرمی سٹاف جنرل قمر جاوید باجوہ نے ملاقات کیتی، ملاقات دوران جنرل قمر جاوید باجوہ نے چیف جسٹس سپریم کورٹ نوں ڈیمز فنڈ لئی رقم جمع کروائی، پاک فوج نے ڈیم فنڈ لئی اک ارب 59لکھ رُپئے جمع کروائے۔ ترجمان سپریم کورٹ مطا بق چیف جسٹس سپریم کورٹ جسٹس میاں ثاقب نثار نال چیف آف آرمی سٹاف جنرل قمر جاوید باجوہ نے ملاقات کیتی۔
ایس موقعے تے آرمی چیف نال ڈی جی آئی ایس پی آر وی سن۔ ملاقات دوران جنرل قمر جاوید باجوہ نے چیف جسٹس سپریم کورٹ نوں ڈیمز فنڈ لئی رقم جمع کروائی۔ آرمی چیف جنرل قمر جاوید باجوہ نے چیف جسٹس سپریم کورٹ جسٹس ثاقب نثار نوں خط لکھ کے ڈیم فنڈدی رقم بارے دسیا۔ پاک فوج اک ارب رُپئے ڈیم فنڈ وچ جمع کروائے گی۔ کمیشن افسراں نے دو دن تے فوجی جواناں نے اک دن دی تنخاہ ڈیم فنڈ وچ جمع کروائی۔
ایس قومی مقصد لئی پاک فوج دے سارے رینکس نے اپنا حصہ پایا اے۔ آرمی چیف نے ملاقات دوران چیف جسٹس نوں دسیا کہ پاک فوج نے ڈیم فنڈ لئی اک ارب 59لکھ رُپئے جمع کروائے نیں۔یاد رہوے کہ پاکستان بھر وچ ہر آؤندے دن نوں پانی دی کمی وچ وادھا ہو رہیا اے تے ایسے گل نوں مُکھ رکھدے ہوئے سپریم کورٹ نے 2ڈیمز بنان دا حکم جاری کیتا سی۔ پاکستان وچ ڈیمز دی اُساری(تعمیر) لئی آپ چیف جسٹس آف پاکستان جسٹس ثاقب نثار نے وی اپنی جیب وچوں 10لکھ رُپئے عطیہ دتاسی۔
ایس توں وکھ پاک فوج نے ڈیماں دی اُساری(تعمیر) وچ حصہ پان دا اعلان کیتاسی۔آئی ایس پی آر مطابق تِنوں فوجاں دے سربراہ و افسر 2 جدکہ جوان اک دن دی تنخاہ کارخیر وچ جمع کروان گے۔ ترجمان پاک فوج میجر جنرل آصف غفور نے آکھیا سی کہ پاک فوج وی ڈیماں دی اُساری وچ اپنا حصہ ودھ کے پائے گی۔ پاک فوج دیامیر بھاشا ڈیم تے مہمند ڈیم دے فنڈز وچ حصہ قومی فرض سمجھدے ہوئے پائے گی۔
ایس توں وکھ سپریم کورٹ ولوں ڈیماں دی فنڈنگ لئی ایس ایم ایس دا آسان طریقہ کاروی متعارف کروا یا گیا اے ، جیہدے تحت موبائل ورتیندڑ(صارف) میسج سروس راہیں 10رُپئے ڈیماں دی اُساری اکاؤنٹ وچ عطیہ کر سکدے نیں۔چیف جسٹس دے اعلان مگروں پاکستان تحریک انصاف دی حکومت نے وی ڈیم فنڈ وچ عطیات جمع کروان دی بینتی کیتی اے۔ 7ستمبر نوں وزیراعظم عمران خان نے وزارت عظمی دا عہدہ سنبھالن مگروں قوم نال اپنا دوجا خطاب کیتا۔
اپنے خطاب دوران اوہناں نے قوم توں ڈیم فنڈ وچ حصہ پان دی اپیل کیتی ۔اوہناں دا کہنا سی کہ ملک وچ ڈیم بنانا ضروری ہو گیا۔ ڈیم نہ بنایا تے ماہرین مطابق 2025وچ خشک سالی شروع ہو جائے گی۔ باہرلے ملک موجود پاکستانی ڈیم فنڈ وچ حصہ پان، میں اوہناں دے پیسیاں دی حفاظت کراں گا۔عمران خان دا کہناسی کہ سبھ توں وڈا پانی دا مسئلا اے۔ جدوں پاکستان آزاد ہویا تے ہر پاکستانی دے حصے آن والا پانی پنج ہزار چھ سو کیوبک میٹر سی جو اج صرف اک ہزار کیوبک میٹر اے۔
عمران خان دا کہنا سی کہ ساڈے کول پانی جمع دی کاپیسٹی صرف 30دن اے۔ ایس لئی ڈیم بنانا بہت ضروری اے۔ جے انج نہ کیتا تے آن والیاں نسلاں لئی بہت مسئلے پیدا ہون گے۔ ایکسپرٹ ایہ آکھدے نیں کہ 2025و چ خشک سالی شروع ہو جائے گی۔ ساڈے ایتھے قحط پے سکدا اے۔ اسیں چیف جسٹس نوں داد دینے آں اوہناں ایہ کم شروع کیتا۔ ایہ کم ساڈے سیاست داناں داسی۔ اوہناں نوں سوچنا چاہیدا سی کہ ایہ کم کردے۔ اسیں چیف جسٹس تے پرائم منسٹر فنڈ نوں اکٹھا کراں گے۔ میں اپیل کرنا واں کہ سارے اپنے مستقبل لئی ایس ڈیم دے فنڈ نوں پیسا دینا شروع کرن۔ خاص طور اُتے اوہ لوک جیہناں نے میری شوکت خانم تے نمل یونیورسٹی بنان وچ مدد کیتی۔
