اسلام آباد(پاکستان پوائنٹ نیوز10۔ستمبر۔2018ء) سابق وزیر اعظم نواز شریف نوں اج اڈیالا جیل توں اسلام آباد دی احتساب عدالت لیجایا گیا جتھے اوہناں خلاف العزیزیہ سٹیل مل ریفرنس کیس دی سنوائی ہوئی۔ نواز شریف نوں اڈیالا جیل توں احتساب عدالت اپڑان لئی سکیورٹی دے سخت انتظامات کیتے گئے سن۔ اسلام آباد دی احتساب عدالت دے جج محمد ارشد ملک نے العزیزیہ سٹیل مل ریفرنس دی سنوائی کیتی۔
ایس موقعے تے سابق وزیر اعظم نواز شریف نوں پارٹی رہنما نے کتاباں دا تحفہ دتا۔ میڈیا رپورٹس وچ دسیاگیا اے کہ پارٹی رہنما ولوں نواز شریف نوں رابرٹ گرین تے جوز ایلفر دی کتاب ’دی48لاز آف پاور‘ تحفے وچ دتی گئی۔ ایس توں وکھ اوہناں نوں اسلامی وظائف دیاں کتاباں وی تحفے دے طور اُتے دتیاں گئیاں۔ نواز شریف نے تحفے وچ دتیاں گئیاں کتاباں اپنے پرسنل سٹاف دے رکن شکیل احمد نوں دے دتیاں۔
