لاہور(پاکستان پوائنٹ نیوز08۔ستمبر۔2018ء) پاکستان مسلم لیگ (ن) دے رہنما خواجا سعد رفیق نے آکھیا اے کہ نویں پاکستان وچ 22دن صرف بونگیاں ماریاں گئیاں، مذہب کارڈ دی ورتوں مکافات عمل اے، پاکستان دی بقاء لئی نواز شریف نوں آزادی دوانی پئے گی۔ اوہناں نے اج مسلم لیگ (ن) دے رہنما آصف کرمانی دے والد سعید کرمانی دی یاد وچ تعزیتی ریفرنس نال خطاب کردے ہوئے آکھیاکہ میاں نواز شریف نوں سزا دین مگروں ہن ثبوت لبھے جا رہے نیں۔
پاکستان دی بقاء لئی نواز شریف نوں آزادی دوانی پئے گی۔ نواز شریف عدلیہ بحالی تحریک لئی ہزاراں لوکاں دے قافلے نال نکلے سن۔ سعد رفیق دا کہنا سی کہ نواز شریف نوں عدلیہ تحریک توں پہلاں وی اک دو وار سوچن نوں آکھیا گیا سی پر اوہناں نے عدلیہ بحال کروان دا عہد کیتا تے نکل پئے۔ اوہناں نے آکھیا کہ اسیں سمجھدے ساں کہ سانوں تحفظ دتا جائے گا پر سانوں کتھے لیا کے کھلار دتا گیا۔
اوہناں نے آکھیا کہ نویں پاکستان وچ 22دن صرف بونگیاں ماریاں گئیاں نیں۔ چینی سفیر ایتھے آئے اوہناں دی عزت تیکر نہیں کیتی گئی۔ سعد رفیق نے آکھیا کہ دھرنا دینا کوئی کم نہیں۔ اسیں وی ہزاراں لوکاں نوں کڈھ کے باہر لیا سکدے آں ۔ اسیں لولی لنگڑی حکومت لئی حلف چُکیا۔ اوہناں نے آکھیا کہ نواز شریف نوں ہن آزادی دوانا بہت ضروری ہو گیا اے۔ جدوں تیکر نواز شریف جیل وچ نیں اودوں تیکر ایہ کنڈا چُبدا رہوے گا۔
