لاہور(پاکستان پوائنٹ نیوز08۔ستمبر۔2018ء) چیف جسٹس آف پاکستان جسٹس ثاقب نثا ر نے ریٹائرمنٹ مگروں ڈیم اُتے پہرہ دین دا اعلان کر دتا۔ سپریم کورٹ لاہور رجسٹری وچ پرچاکاراں نال غیر رسمی گل بات کردے ہوئے چیف جسٹس نے آکھیا کہ وزیر اعظم عمران خان دا پانی بارے بیان چنگا اے۔ اوہناں نے آکھیا کہ ڈیم فنڈ بارے فیصلا اسیں صلاح مگروں کیتا ۔سپریم کورٹ چھیتی ڈیمز دے معاملے اُتے اک بین الاقوامی کانفرنس کروائے گی۔
چیف جسٹس نے آکھیا کہ ریٹائرمنٹ مگروں ڈیم اُتے پہرہ دیواں گا بھاویں مینوں چھونپڑی بناکے ای کیوں نہ رہنا پئے۔ اوہناں نے ہور آکھیا کہ وزیراعظم عمران خان ہور صلاح کردے تے اوہناں نوں حقائق دسدے۔یاد رہوے پچھلے دیہاڑے وزیراعظم عمران خان نے وزارت عظمی دا عہدہ سنبھالن مگروں قوم نال اپنا دوجا خطاب کیتا۔ اپنے خطاب دوران اوہناں نے قوم توں ڈیم فنڈ وچ حصہ پان دی اپیل کیتی ۔
اوہناں دا کہنا سی کہ ملک وچ ڈیم بنانا ضروری ہو گیا۔ ڈیم نہ بنایا تے ماہرین مطابق 2025وچ خشک سالی شروع ہو جائے گی۔ باہرلے ملک موجود پاکستانی ڈیم فنڈ وچ حصہ پان، میں اوہناں دے پیسیاں دی حفاظت کراں گا۔عمران خان دا کہناسی کہ سبھ توں وڈا پانی دا مسئلا اے۔ جدوں پاکستان آزاد ہویا تے ہر پاکستانی دے حصے آن والا پانی پنج ہزار چھ سو کیوبک میٹر سی جو اج صرف اک ہزار کیوبک میٹر اے۔
عمران خان دا کہنا سی کہ ساڈے کول پانی جمع دی کاپیسٹی صرف 30دن اے۔ ایس لئی ڈیم بنانا بہت ضروری اے۔ جے انج نہ کیتا تے آن والیاں نسلاں لئی بہت مسئلے پیدا ہون گے۔ ایکسپرٹ ایہ آکھدے نیں کہ 2025و چ خشک سالی شروع ہو جائے گی۔ ساڈے ایتھے قحط پے سکدا اے۔ اسیں چیف جسٹس نوں داد دینے آں اوہناں ایہ کم شروع کیتا۔ ایہ کم ساڈے سیاست داناں داسی۔ اوہناں نوں سوچنا چاہیدا سی کہ ایہ کم کردے۔ اسیں چیف جسٹس تے پرائم منسٹر فنڈ نوں اکٹھا کراں گے۔ میں اپیل کرنا واں کہ سارے اپنے مستقبل لئی ایس ڈیم دے فنڈ نوں پیسا دینا شروع کرن۔ خاص طور اُتے اوہ لوک جیہناں نے میری شوکت خانم تے نمل یونیورسٹی بنان وچ مدد کیتی۔
