اسلام آباد(پاکستان پوائنٹ نیوز08۔ستمبر۔2018ء) مسلم لیگ (ن) دے قائدنواز شریف تے اوہناں دی دھی مریم نواز اڈیالا جیل وچ قید نیں تے احتساب عدالت ولوں ملن والی سزا بھگت رہے نیں۔ پر ہن مسلم لیگ (ن) نے اپنے قائد دی اڈیالا جیل توں رہائی لئی تحریک چلان دا اعلان کر دتا اے۔ ایہو نہیں بلکہ ایس حوالے نال باقاعدہ منصوبہ بندی وی کیتی جا رہی اے۔ مسلم لیگ (ن) دے سینیٹر چودھری تنویر دے گھر این اے 60دے ضمنی الیکشن بارے ہون والے کنونشن نال خطاب کردے ہوئے لیگی رہنماواں نے اعلان کیتا کہ چھیتی نواز شریف دی رہائی لئی تحریک شروع کیتی جائے گی، 14اکتوبر نوں ہون والا الیکشن حنیف عباسی دا الیکشن اے۔
ایہ الیکشن نواز شریف دی امانت اے راولپنڈی دے لوک اوہناں دیاں خدمتاں نہیں بُھل سکدے اوہ پہلے وی اوہناں نال سن تے آؤندے ویلے نوں وی اوہناں دے نال کھلوتے ہون گے ۔ رہنماواں دا کہنا سی کہ ساڈا جینا مرنا نواز شریف نال اے ۔ نواز شریف دی سزا ایس ملک دی ترقی خلاف سازش اے۔ نواز شریف دی رہائی لئی کسے لانگ مارچ توں گریز نہیں کراں گے، کسے لادین تے قادیانی نوں ایس ملک اُتے راج نہیں کرن دیواں گے۔ یاد رہوے کہ سابق وزیر اعظم نواز شریف، اوہناں دی دھی مریم نواز تے داماد کیپٹن (ر) صفدر تے ایہدے نال نال مسلم لیگ (ن) دے رہنما حنیف عباسی اڈیالا جیل وچ قید نیں۔
