اسلام آباد(پاکستان پوائنٹ نیوز07۔ستمبر۔2018ء) پاکستان وچ فساد تے ریاستی اداریاں خلاف منافرت کھلارن وچ غیر ملکی اداریاں دے ملوث ہون دا انکشاف ہویا اے۔ قومی اخبار وچ چھپن والی اک رپورٹ مطابق وزیرستان، بلوچستان تے فاٹا وچ امن تباہ کرن تے حساس اداریاں خلاف نفرت پیدا کرن دی غیر ملکی سازش وچ پاکستان اندر موجود کُجھ لوک وی ملوث سن۔غیر ملکی خفیہ ایجنسیاں لئی کم کرن والے منظور پشتین سنے تن سیاسی تے دو علاقائی جماعتاں دے ایس سازش وچ شامل ہون دا انکشاف ہویا اے۔
وسیلیاں دا کہنا اے کہ پاکستان دے حساس اداریاں خلاف غیر ملکی خفیہ ایجنسی (را)موساد تے این ڈی ایس دی ملی بھگت نال خوفناک سازش تیار کیتی جا رہی اے۔ ایس سازش دے تحت پاکستانی لوکائی خاص کر وزیرستان، بلوچستان تے فاٹا دے واسیاں وچکار حساس اداریاں خلاف نفرت پیدا کیتی جائے گی۔سازش دے تحت کُجھ بندے جانکے سکیورٹی فورسز دا روپ دھار کے عام لوکاں اُتے فائرنگ کرن گے تے ایس سارے واقعے دی باقاعدہ ویڈیو بنائی گئی جائے گی جو مگروں سوشل میڈیا اُتے اپ لوڈ کیتی جائے گا تے ایہ تاثر دین دی کوشش کیتی جائے گی کہ پاکستانی اداریاں نے پختوناں تے بلوچاں اُتے ظلم کیتا اے تے ایہدے نال لسانی بنیاد اُتے وی نفرت وچ وادھا ہوئے گا۔
ایس توں وکھ دوجیاں زباناں بولن والیاں نوں ایہ تاثر دتا جا ئے گا ایس ملک وچ پختون تے بلوچ محفوظ نہیں۔ وسیلیاں دا کہنا اے کہ ایس حوالے نال پاکستان مخالف طاقتاں نے پاکستان اندر بھاری فنڈنگ کیتی ہوئی اے تے کئی سیاسی جماعتاں تے علاقائی جماعتاں نوں نال رلایا جائے گا۔ایس خوفناک سازش دے حوالے نال کئی مذہبی بندیاں نوں ورتیا جائے گا۔ وسیلیاں مطابق وزیر ستان مگروں سندھ وچ وی ایہ خطرناک کھیڈ کھیڈن دی منصوبہ بندی کیتی گئی اے۔سندھ وچ ایم کیو ایم لندن تے سندھ واسیاں نوں ایس نفرت کھلارن والے منصوبے وچ ورتیا جائے گا۔جیہدے پاکستان دے اہم اداریاں نوں ثبوت وی ملے نیں۔
