لاہور(پاکستان پوائنٹ نیوز07۔ستمبر۔2018ء) لاہور ہائی کورٹ نے وزیر اعظم عمران خان دے چناؤ نوں غیر آئینی قرار دین بارے درخاست اُتے الیکشن کمیشن آف پاکستان (ای سی پی) تے 69ارکان قومی اسمبلی نوں نوٹس جاری کر دتا۔ جسٹس شاہد وحید اُتے مشتمل سنگل بنچ نے وزیراعظم عمران خان دے چناؤ نوں غیر آئینی قرار دین دی درخاست اُتے سنوائی کیتی۔ عدالت وچ دائر درخاست وچ وزیر اعظم عمران خان، الیکشن کمیشن، پاکستان پیپلز پارٹی تے جماعت اسلامی سنے 69رکن اسمبلی نوں فریق بنایا گیا۔
درخاست گزار ولوں موقف اختیار کیتا گیا کہ وزیر اعظم دے چناؤ لئی ملک دیاں 2وڈیاں جماعتاں نے ووٹ نہیں دتے جدکہ قانون مطابق وزیر اعظم دے چناؤ لئی پارلیمنٹ دے ہر رکن دا ووٹ پانا ضروری اے۔ درخاست گزار دا کہنا سی کہ پیپلز پارٹی تے جماعت اسلامی ایوان وچ موجود نیں پر اوہناں نے ووٹ نہیں پایا، ایس لئی دوویں سیاسی جماعتاں دے 69ووٹاں دے بغیر وزیر اعظم دا چناؤ قانون دے اُلٹ اے۔ درخاست وچ ہور آکھیا گیا ا ے کہ جدوں وزیر اعظم دا چناؤ ٹھیک نہیں تے فیر حکومت وی نہیں بن سکدی۔
