راولپنڈی(پاکستان پوائنٹ نیوز06۔ستمبر۔2018ء) شاہد خان آفریدی شہیداں دی یاد وچ ہون والی تقریب و چ نسوار رکھدے کیمرے دی اکھ توں نہ بچ سکے۔ تفصیل مطابق پاک فوج ساڈا اثاثہ اے ۔ ہر سال قوم پاک فوج دیاں قربانیاں دی یاد وچ 6ستمبر نوں دفاع دیہاڑ مناندی اے۔ ایس دن نوں منان لئی اُچیچے انتظامات کیتے جاندے نیں جدکہ قوم دا جوش تے جذبہ ویکھن دے قابل ہوندا اے۔
ایس وار پاک فوج نے ’یوم شہداء‘ دے حوالے نال قوم دے ناں اُچیچا پیغام جاری کیتا سی۔ ایس موقعے اُتے ’ہمیں پیار ہے پاکستان سے‘ اک خاص مہم چلائی گئی۔ فوج دی آواز اُتے لبیک آکھدے ہوئے ہر کوئی ایس مہم دا حصہ بن گیا۔ ایس موقعے اُتے اپنے ملک اُتے قربان ہون والیاں نوں جوش تے جذبے نال یاد کیتا گیا۔جدکہ مرکزی تقریب آرمی جنرل ہیڈ کوارٹر راولپنڈی وچ ہوئی۔
جیہدے وچ وزیر اعظم عمران خان نے بطور اُچیچے پروہنے رلت کیتی۔ عمران خان پاکستان دے پہلے وزیر اعظم نیں جو ایس تقریب وچ اُچیچے پروہنے دے طور اُتے رلتی ہوئے۔ ایس تقریب وچ قومی سیاسی قیادت شہیداں دی یاد منان لئی اختلافات بُھلا کے اک ہو گئی۔ تقریب وچ حکومتی بندیاں توں وکھ اپوزیشن لیڈر میاں شہباز شریف وی لیگی قیادت نال موجود سن۔ ایہدے نال نال بلاول بھٹو زرداری وی پیپلز پارٹی دی قیادت نال ایس تقریب وچ رلتی ہوئے۔
سیاسی بندیاں توں وکھ ایس تقریب وچ کھڈاری، فنکار، شہیداں دے وارث تے ہور لوکاں رلتی ہوئے۔ایس تقریب وچ مشہور کھڈاری شاہد خان آفریدی وی رلتی ہوئے تے ایس دوران اوہناں نے اک اجیہی حرکت کیتی کہ سبھ دیاں نظراں وچ آ گئے۔ شاہد آفریدی تقریب دوران نسوار رکھدے ہوئے رنگے ہتھیں پھڑے گئے۔ اوہناں نے نسوار رکھن توں پہلاں ایدھر اودھر ویکھیا تے فیر مونہ وچ نسوار رکھ لی پر شاہد آفریدی ایہ سبھ کردے ہوئے کیمرے دی اکھ توں نہ بچ سکے۔
