اسلام آباد(پاکستان پوائنٹ نیوز06۔ستمبر۔2018ء) متحدہ قومی موومنٹ پاکستان دے سینئر رہنما ڈاکٹر فاروق ستار نے آکھیا اے کہ اوہناں نوں پاکستان تحریک انصاف نے پارٹی وچ رلتی ہون دی دعوت دتی اے جیہدے بارے اوہ اپنے قریبی بیلیاں نال صلاح کر رہے نیں۔ الیکشن کمیشن دے باہر میڈیا نال گل بات کردے ہوئے ڈاکٹر فاروق ستار نے اک وار فیر اپنے ایس دعوے نوں دہرایا کہ پی ٹی آئی چاہندی اے کہ عارف علوی دے صدر چُنے جان مگروں این اے 247دی خالی ہون والی سیٹ توں ضمنی الیکشن وچ حصہ لواں۔
فاروق ستار نے آکھیاکہ پی ٹی آئی دے کُجھ ارکان نے پارٹی وچ رلتی ہون دی دعوت دتی اے جیہدے بارے قریبی بیلیاں نال صلاح کر رہیا واں۔ ایم کیو ایم رہنما نے آکھیا کہ عارف علوی دے صدر چُنے جان مگروں این اے 247دی سیٹ خالی ہون والی اے تے تحریک انصاف دی کوشش اے کہ این اے 247توں الیکشن لڑاں۔ فاروق ستار نے اپنی پٹیشن بارے دسیا کہ الیکشن کمیشن وچ وڈیاں سیاسی جماعتاں دے وادھو خرچیاں بارے درخاست دتی اے۔اوہناں دا کہنا سی کہ قومی اسمبلی دے رکن دے خرچے 40لکھ رکھے گئے نیں، سیاسی جماعتاں لکھاں تے کروڑاں رُپئے خرچ کردیاں نیں ، ایس طرحاں امیدوار نوں عام انتخابات وچ اکو جہے موقعے نہیں ملدے۔
