راولپنڈی(پاکستان پوائنٹ نیوز06۔ستمبر۔2018ء) چیف آف آرمی سٹاف جنرل قمر جاوید باجوہ تے اوہناں دی گھر والی شہید پولیس سب انسپکٹر عباس دے گھر گئے، آرمی چیف جنرل قمر جاوید باجوہ نے پولیس لائنز وچ شہیددے گھر والیاں نال ملاقات کیتی تے قوم لئی شہید انسپکٹر عباس دی قربانی نوں خراج عقیدت پیش کیتا۔ آئی ایس پی آر مطابق آرمی چیف جنرل قمر جاوید باجوہ تے اوہناں دی بیوی دفاع دیہاڑ اُتے سب انسپکٹر عباس دی وڈی قربانی نوں خراج عقیدت پیش کرن لئی اوہناں دے گھر اپڑے۔
آرمی چیف جنرل قمر جاوید باجوہ نے شہید دے گھر والیاں نال ملاقات وچ شہید انسپکٹر عباس دے درجات دی اُچیائی لئی دعا کیتی تے گھر والیاں نوں قوم لئی شہید دی قربانی اُتے خراج عقیدت وی پیش کیتا۔آرمی چیف جنرل قمر جاوید باجوہ نے قوم لئی شہید انسپکٹر دی قربانی نوں سلاہندے ہوئے آکھیا کہ اپنی جان قربان کرن توں ودھ کوئی وڈی قربانی نہیں۔ آرمی چیف نے آکھیا کہ ساڈی جان پاکستان لئی وقف اے۔ یاد رہوے کہ اج ملک بھر وچ 53واں دفاع دیہاڑ(یوم دفاع) منایا جا رہیا اے ۔ ایس موقعے تے شہیداں دیاں یادگاراں اُتے پُھل چڑھان تے فاتحہ پڑھن دا سلسلا جاری اے۔ پاکستان سنے دنیا بھر وچ پاکستان نال محبت کرن والے پاکستانی ایس دن نوں منا رہے نیں۔
