اسلام آباد(پاکستان پوائنٹ نیوز05۔ستمبر۔2018ء) شاہ محمود قریشی دے دبنگ انداز نے کروڑاں پاکستانیاں دا سر فخر نال اُچا کر دتا۔ وزیر خارجا شاہ محمود قریشی دا کہنا سی کہ اسیں امریکی وزیر خارجا نال پیسیاں دی گل نہیں کیتی کیونکہ اسیں اپنی عزت دی دال روٹی کھانا جاندے آں۔ تفصیل مطابق امریکی وزیر خارجا اپنے 27رکنی وفد نال بدھ دے دیہاڑے پاکستان دے دورے اُتے اسلام آباد اپڑے۔
پاک امریکا کشیدہ تعلقات کارن پاکستان نے واضح پیغام دین لئی امریکی وزیر خارجا دا اینا کوئی خاص استقبال نہیں کیتا۔ کسے وزیر یاں حکومتی بندے ولوں وزارت خارجا دے اک افسر نے نور خان ائر بیس اُتے امریکی وزیر خارجا مائیک پوپیو دا استقبال کیتا۔ پاکستان آمد مگروں امریکی وزیر خارجا تے اوہناں دے وفد نے حکومت پاکستان دے اعلا حکام، وزیر خارجا شاہ محمود قریشی، آرمی چیف جنرل قمر جاوید باجوہ تے ہور اعلا عسکری قیادت نال اُچیچیاں ملاقاتاں کیتیاں۔
ایس ملاقات دے حوالے نال وزیر خارجا شاہ محمود قریشی نے بریفنگ دیندے ہوئے آکھیاکہ اسیں امریکا نال دو پاسی(باہمی) تعلقات دی گل کیتی اے۔ اج دی بیٹھک ہر حوالے نال چنگی سی۔ اسیں اگانہ ودھن دا موقف لے کے ودھے آں۔ ایس موقعے تے اوہناں نے دسیا کہ اسیں اج امریکی وزیر خارجا نال پیسیاں دی گل نہیں کیتی۔ اوہناں دا کہنا سی کہ اللہ نے پاکستان نوں اجیہا حسین موسم تے زمین دتی اے کہ اسیں اپنی کنک آپ اُگا سکدے تے اپنی لوکائی نوں اپنے وسائل نال کھوا سکئیے۔
ساڈے لئی ساڈی قوم دی عزت اہم اے۔ میں ایہ سمجھنا واں کہ عزت دی دال روٹی ذلت دے پیسیاں توں بہتر اے۔ وزیر خارجا دے ایس دبنگ موقف نے قوم دا سِر اُچا کر دتا اے تے امریکا لئی وی شیواں نوں واضح کر دتا اے کہ اج دا پاکستان پہلے دے پاکستان توں بہتر اے۔
