لاہور(پاکستان پوائنٹ نیوز05۔ستمبر۔2018ء) پاکستان پیپلز پارٹی نے بجلی تے گیس دیاں قیمتاں وچ وادھے دے فیصلے نوں رد کردے ہوئے پارلیمنٹ دے اندر تے باہر احتجاج کرن دا اعلان کر دتا۔ پیپلز پارٹی دے چیئرمین بلاول بھٹو دے ترجمان سینیٹر مصطفی نواز کھوکھر نے اپنے بیان وچ آکھیا کہ لوکائی نوں ریلیف دین دے وعدے کرن والیاں نے آؤندے ای مہنگائی دے پہاڑ توڑ دتے نیں۔
100دناں دے حکومتی منصوبے دا پہلا تحفہ بجلی تے گیس دیاں قیمتاں وچ وادھے دی صورت وچ دتا گیا اے۔ اوہناں نے آکھیا کہ گیس دیاں قیمتاں وچ 100فیصد وادھا لوکائی اُتے ظلم اے۔ پٹرولیم وستاں دیاں قیمتاں وچ چند رُپئے کمی دا ڈرامہ کر کے گیس دیاں قیمتاں ودھا دتیاں گئیاں جدکہ عمران خان سرکار نے پہلے ای بجلی دی قیمت وچ دو رُپئے یونٹ دا وادھا کر دتا اے۔ کتھے نیں اوہ جو آکھدے سن اقتدار وچ آؤندے ای پٹرولیم وستاں توں سارے ٹیکس ختم کر دیواں گے۔ اوہناں نے آکھیا کہ پاکستان پیپلز پارٹی بجلی تے گیس دیاں قیمتاں وچ وادھے دے فیصلے نوں رد کردے ہوئے پارلیمنٹ دے اندر تے باہر احتجاج کریگے۔
