لاہور(پاکستان پوائنٹ نیوز05۔ستمبر۔2018ء) کینیڈین نژادتاجر نے عمران خان نوں ہیلی کاپٹر گفٹ کرن دا اعلان کر دتا۔ تفصیل مطابق پچھلے کُجھ دناں توں سوشل میڈیا اُتے وزیر اعظم عمران خان دے ہیلی کاپٹر دے حوالے نال بحث ہوندی رہی اے۔ وفاقی وزیر اطلاعات فواد چوھری دے ہیلی کاپٹر دے فی کلو میٹر 55رُپئے لاگت دے بیان نے سوشل میڈیا اُتے ڈاڈھی دھم پائی رکھی۔
کینیڈین نژاد پاکستانی خالد ملک نے ایس حوالے نال اہم اعلان کیتا اے۔ اوہناں دا اک ویڈیو پیغام وچ کہنا ا ے میرا ناں خالد ملک اے تے میں پچھلے 16ورھیاں توں کینیڈا وچ آں۔ میرا اپنا کاروبار اے تے میرے کاروبار دی نوعیت انج دی اے کہ ساڈا کئی کمیونیٹیز دے لوکاں نال واسطہ پیندا اے تے ہر کوئی اپنے ملک دی گل کردا اے تے جدوں اسیں پاکستان بارے گل کردے ساں تے پاکستان دے حالات دا سُن کے سانوں بہت دُکھ ہوندا سی۔
ایہ صرف میرا نہیں بلکہ باہرلے ملک وسدے ہر پاکستانی دا درد اے تے ہن جدوں کوئی آس لگی اے کہ پاکستان وچ تبدیلی آ رہی اے تے سانوں کُجھ غیر اہم موضوعاں وچ پا دتا گیا اے۔ ایس لئی میری پاکستانی قوم توں بینتی اے کہ انج دے غیر موضوعات اُتے بحث کرن دی بجائے ملک دی ترقی تے بھلائی ول توجہ دیو۔ میں بطور محب الوطن پاکستانی وزیر اعظم عمران خان نوں ہیلی کاپٹر، فیول تے اوہدی مرمت دی آفر کرنا واں۔
تے ایہد ے مگروں میں ایہ آس رکھاں گا کہ ایس طرحاں دے غیر اہم موضوع پاکستان وچ بحث ہیٹھ نہیں آن گے۔ اک نجی ٹی وی چینل نال گل بات کردے ہوئے خالد ملک دا کہنا سی کہ میرا تعلق کسے سیاسی جماعت توں نہیں اے۔ پچھلے دناں توں پاکستانی میڈیا اُتے جو تنقید چل رہی اے اوہنوں سُن کے اوورسیز پاکستانیاں نوں بہت دُکھ ہوندا اے۔ جے مسئلا ہیلی کاپٹر دا اے تے میں ایہ دین دا اعلان کرنا واں۔ عمران خان دا دفتر جیویں میرے نال رابطہ کرے تے وزیر اعظم دی سکیورٹی نوں مُکھ رکھدے ہوئے جو وی ہیلی کاپٹر بہترین ہوئے گا اوہ اوہناں نوں دو مہینیاں دے اندر پاکستان گھل دتا جائے گا۔
