کراچی(پاکستان پوائنٹ نیوز05۔ستمبر۔2018ء) پیپلز پارٹی دے رکن سندھ اسمبلی شرجیل انعام میمن دے کمرے وچوں شراب دیاں بوتلاں برآمد ہون دے معاملے دیاں تحقیقات لئی جیل انتظامیہ نے اوہناں دا ڈی این اے ٹیسٹ کروان دی سفارش کرن دا فیصلا کیتا اے۔ وسیلیاں مطابق جیل انتظامیہ نے ڈی این اے ٹیسٹ لئی تحقیقاتی کمیٹی نوں زبانی درخاست کر دتی پر تحریری درخاست جیل انتظامیہ دی انکوائری مگروں کیتی جائے گی۔
یاد رہوے کہ شرجیل میمن محکمہ اطلاعات وچ پونے 6ارب رُپئے دی کرپشن دے مقدمے وچ گرفتار نیں تے ضیاء الدین ہسپتال وچ اوہناں دا علاج جاری سی جتھے چیف جسٹس نے ہفتے نوں اچانک اوہناں دے کمرے دا دورہ کیتا تے اوتھوں مبینہ طور اُتے شراب دیاں بوتلاں برآمد ہوئیاں۔ بعدوں آغا خان ہسپتال توں شرجیل میمن دے خون دے نمونیاں دا ٹیسٹ کروایا گیا جیہدے وچ الکوحل دا عنصر نہیں پایا گیا تے سپریم کورٹ وچ اک کیس دی سنوائی دوران چیف جسٹس نے ریمارکس دتے کہ سانوں پتا لگا اے کہ معاملے وچ ٹیمپرنگ ہوئی اے۔
