اسلام آباد(پاکستان پوائنٹ نیوز04۔ستمبر۔2018ء) پاکستان تحریک انصاف شیخ رشید دی وجہ توں مشکل وچ پھس گئی۔ تحریک انصا ف دی مقامی قیادت نے اک ہنگامی اجلاس وچ شیخ رشید دے بھتیجے راشد شفیق نوں ممکنہ ٹکٹ دین خلاف قرارداد منظور کرلی۔ تفصیل مطابق پاکستان تحریک انصاف نے الیکشن 2018وچ کامیابی مگروں حکومت بنا لی اے۔ پر اوہنوں جتھے اک پاسے حکومتی کماں وچ اوکڑاں دا ساہمناے اوتھے دوجے پاسے ملک بھر وچ ہون والے ضمنی الیکشن نے پی ٹی آئی نوں اک ہور امتحان وچ پا دتا اے۔ پی ٹی آئی نے این اے 53توں علی اعوان نوں ضمنی الیکشن لئی ٹکٹ دین دا فیصلا کیتا سی جدکہ میجر صادق دی سیٹ اُتے امین اسلم ضمنی الیکشن لڑن گے، ایس طرحاں اہم ترین حلقے این اے 60نوں اک وار فیر شیخ رشید دے خاندان دے سپرد کر دتا گیا سی۔ ایس حوالے نال خبر ایہ سی کہ شیخ رشید
دے بھتیجے شیخ راشد نوں این اے 60توں تحریک انصاف دا ٹکٹ مل گیا اے۔ شیخ رشید دے بھیتجے شیخ راشد پاکستان تحریک انصاف ولوں الیکشن وچ میدان وچ اُترن گے۔ پر ایس فیصلے نے تحریک انصاف نوں ا وکڑاں وچ پا دتا اے۔ ایس حوالے نال تحریک انصاف راولپنڈی دی قیادت نے اک ہنگامی اجلاس وچ راشد شفیق نوں ممکنہ ٹکٹ دین خلاف قرارداد منظور کیتی۔ قرار داد وچ آکھیا گیا اے کہ تحریک انصاف نوں اپنے امیدوار افتخار چودھری نوں ٹکٹ دینا چاہیدا۔
