اسلام آباد(پاکستان پوائنٹ نیوز04۔ستمبر۔2018ء) وزیر اعظم عمران خان دی دوجی سابقہ بیوی ریحام خان نے اپنی کتاب وچ عمران خان تے اوہناں دے قریبی ساتھیاں بارے کئی انکشافات کیتے۔ ایہناں انکشافات اُتے کئی جھیڑے وی پیدا ہوئے پر سبھ توں وڈا دعوا جو ریحام خان دی وٹس ایپ اُتے گھمن والی کتاب وچ عمران خان دی ذاتی زندگی بارے کیتا گیا سی اوہ ایہ اے کہ عمران خان دے کُھسرے ماڈل نال تعلقات نیں۔
پر ہن ایس حوالے نال ذکر کیتے گئے کُھسرے رمل علی دا بیان وی ساہمنے آیا اے۔ سماجی رابطے دی ویب سائٹ فیس بک اُتے اپنے ویڈیو پیغام وچ رمل علی نے آکھیا کہ میں اوس خبر بارے صرف اینا ای آکھاں گی کہ ایس طرحاں دیاں خبراں دی تصدیق کر لینی چاہیدی تے بغیر تصدیق انج دیاں خبراں نوں نہیں چلانا چاہیدا۔ جے تہانوں میرے بارے کُجھ وی پتا اے تے سبھ توں پہلاں میرے نال گل بات کرو۔
رمل علی نے آکھیا کہ مینوں کوئی پتا نہیں اے کہ ایہ کتاب کس نے لکھی تے ایہدا لکھاری کون اے؟تے کیہنے چھاپی اے ۔ پاکستان وچ ایس قسم دی چھپائی کتھے ہو رہی اے؟انج دے مواد دی چھپائی لئی کون اجازت دیندا اے؟میں تے میرے خاندان نوں ایس طرحاں دیاں گلاں نال دُکھ ہویا۔ میری سارے میڈیا اگے بینتی اے کہ اوہ اپنی سیاست تے خبراں توں مینوں دور رکھے۔ میں اک عام انسان آں، جیہنے ایس انڈسٹری وچ تے ملک وچ اپنی کمیونٹی دے حوالے نال اک عزت بنائی اے تے میں چاہنی آں کہ میری عزت نفس نوں کوئی ٹھیس نہ پہنچائے۔میں نہیں چاہندی کہ انج دی کوئی جھوٹھی خبر میری ساکھ نوں متاثر کرے۔ آس کرنی آں کہ سارے میڈیا چینلز نوں ایہ گل سمجھ آ جائے گی۔
