اسلام آباد(پاکستان پوائنٹ نیوز04۔ستمبر۔2018ء) صدارتی الیکشن وچ فلور کراسنگ دا انکشاف ہویا اے۔ قومی اسمبلی وچ تحریک انصاف دے امیدوار نوں 9ووٹ وادھو جدکہ اعتزاز احسن نوں 7وادھو ووٹ پئے۔ تفصیل مطابق حکومتی جماعت تحریک انصا ف دے امیدوار عارف علوی اسلامی جمہوریہ پاکستان دے 13ویں صدر چُنے گئے نیں۔ عارف علوی نوں 353،مولانا فضل الرحمان نوں185 تے اعتزاز احسن نوں 124الیکٹورل ووٹ ملے۔
صدارتی الیکشن وچ حکومتی جماعت دے امیدوار عارف علوی، اپوزیشن دے امیدوار مولانا فضل الرحمان، اپوزیشن جماعت پیپلز پارٹی دے امیدوار اعتزاز احسن نے حصہ لیا۔ بلوچستان اسمبلی توں عارف علوی نوں 45، فضل الرحمان نوں 15ووٹ جدکہ اعتزاز احسن نوں کوئی ووٹ نہیں ملیا۔ سندھ اسمبلی وچ اعتزاز احسن نوں 100، عارف علوی نوں 56تے فضل الرحمان نوں اک ووٹ ملیا۔
خیبرپختونخوا اسمبلی وچ عارف علوی نوں 78، مولانا فضل الرحمان نوں26تے اعتزاز احسن نوں 3ووٹ پئے نیں۔انج عارف علوی نوں ٹوٹل 212،مولانا فضل الرحمان نوں131 تے اعتزاز احسن نوں81ووٹ ملے جدکہ 6ووٹ ردہوئے۔ ایس حوالے نال خبر ایہ اے کہ صدارتی الیکشن وچ فلور کراسنگ دا انکشاف ہویا اے۔ قومی اسمبلی وچ 16ارکان نے اپنی پارٹی نال بغاوت کرکے مخالف امیدوار نوں ووٹ دتا۔
قومی اسمبلی وچ اتحادیاں تے تحریک انصاف دے ارکان دی گنتی 203اے جدکہ اوہناں نوں 212ووٹ ملے۔ ایس طرحاں پیپلز پارٹی دے صدارتی امیدوار اعتزاز احسن نوں 74ووٹ ملے جو اوہناں دے ارکان دی گنتی توں 7ووٹ ودھ نیں۔ جیہدے توں لگدا اے کہ مسلم لیگ (ن) تے اوہناں دے اتحادیاں دے کئی ارکان اسمبلی نے اپنیاں جماعتاں نال بغاوت کرکے تحریک انصاف نوں ووٹ دتا۔
