چکوال(پاکستان پوائنٹ نیوز04۔ستمبر۔2018ء) ڈی پی او پاکپتن رضوان گوندل دے تبادلے دا معاملا اجے پوری طرحاں حل نہیں ہویا سی کہ پاکستان تحریک انصاف دی حکومت نوں اک ہور جھیڑے (تنازعے) دا ساہمنا کرنا پے گیا۔ تفصیل مطابق چکوال دے ڈپٹی کمشنر نے الزام لایا اے کہ پاکستان تحریک انصاف دے رکن قومی اسمبلی سردار ذوالفقار علی خان میرے اُتے درجناں دے حساب نال ریونیو افسراں تے پٹواریاں دے تبادلیاں لئی دباء پا رہے نیں۔
الیکشن کمیشن آف پاکستان تے سپریم کورٹ رجسٹرار دے ناں لکھے گئے اک خطے وچ ڈپٹی کمشنر چکوال غلام ساغر شاہد نے آکھیا کہ پاکستان تحریک انصاف دے رکن قومی اسمبلی سردار ذوالفقار علی خان نے گرد آورز، پٹواریاں تے ریونیو افسراں دے تبادلیاں لئی میرے اُتے دباء پایا تے اوہناں دی گل نہ منن دے نتیجے وچ خطرناک قسم دی دھمکی وی دتی۔ ایس حوالے نال اک سرکاری افسر نے ڈی سی چکوال دے خط دی تصدیق وی کیتی تے آکھیا کہ اوہناں نے اک خط لکھیا سی جو سوشل میڈیا اُتے وی وائرل ہویا۔
سرکاری افسر نے دعوا کیتا کہ ڈی سی چکوال نے خط نال سارے ضروری ثبوت وی دتے جیہناں توں ایہ ثابت ہوسکے کہ حکومتی جماعت پاکستان تحریک انصاف دے رکن قومی اسمبلی حکومتی معاملات وچ دخل دین دی کوشش کر رہے نیں ایس حوالے نال پاکستان تحریک انصاف دے رکن قومی اسمبلی سردار ذوالفقار علی خان نے اپنے اُتے لائے گئے الزاماں نوں رد کر دتا۔ اوہناں نے آکھیا کہ میں ایہناں الزاماں دا جواب کسے متعلقہ فورم اُتے دیواں گا۔
