پاکستانیاں دے دبئی وچ 150ارب ڈالر دے خفیہ اثاثیاں دا پتا چل گیا

پاکستانیاں دے دبئی وچ 150ارب ڈالر دے خفیہ اثاثیاں دا پتا چل گیا

اسلام آباد(پاکستان پوائنٹ نیوز03۔ستمبر۔2018ء) پاکستانیاں دے دبئی وچ 150ارب ڈالر دے خفیہ اثاثیاں دا پتا چل گیا اے۔ سپریم کورٹ وچ پاکستانیاں دے باہرلے ملک اثاثیاں بارے آپ نوٹس کیس دی سنوائی ہوئی۔ چیف جسٹس نے سنوائی دوران ریمارکس دتے کہ صرف دبئی وچ 150ارب ڈالر دے اثاثے ملے نیں، احتساب شروع ہون دے ڈر توں پاکستان توں پیسا باہر گھلیا گیا۔ ملک دا بہت سارا پیسا حوالے راہیں باہر گیا، ایمنسٹی سکیم مگروں پیسے باہر پئے نیں۔

جسٹس عمر عطابندیال نے آکھیا کہ پاکستان توں باہر ناجائز طور اُتے پیسے لیجان والیاں خلاف کارروائی کیتی جائے، اوہناں اُتے ٹیکس نہیں بلکہ بھاری جرمانے ہونے چاہیدے۔ گورنر سٹیٹ بنک نے آکھیا کہ اثاثے رکھن والیاں توں پہلا سوال رقم دی منتقلی بارے ہوئے گا تے جائیداد بارے بیان حلفی لتا جائے گا۔ چیف جسٹس نے آکھیا کہ ویکھدے آں ایس معاملے وچ وزیر اعظم دی میٹنگ وچ کیہ ہوندا اے، فیر جو عدالت نوں حکم دینا پیا دیواں گے۔ سپریم کورٹ نے ایف بی آر کولوں 100بندیاں دی لسٹ منگ لی، جیہناں نوں خفیہ اثاثیاں اُتے نوٹس جاری کیتے گئے نیں۔ عدالت نے حکم دتا کہ جیہناں نوں نوٹس جاری کیتے گئے اوہناں دے ناں راز وچ رکھے جان۔ جیہدے مگروں کیس دی سنوائی بدھ تیکر لئی ملتوی کر دتی گئی۔