لاہور(پاکستان پوائنٹ نیوز03۔ستمبر۔2018ء) لاہور ہائی کورٹ نے ایف بی آڑ ولوں تحریک انصاف دے رہنما جہانگیر ترین نوں 19کروڑ91لکھ دی ٹیکس ریکوری لئی گھلے گئے نوٹسز معطل کردے ہوئے تاحکم ثانی ریکوری توں روک دتا۔ لاہور ہائی کورٹ دے جسٹس شاہد وحید نے جہانگیر ترین دی درخاست اُتے سنوائی کیتی، جیہدے وچ وفاقی حکومت، ایف بی آر ، کمشنران لینڈ ریونیو تے ہور نوں فریق بنایا گیا۔
ایس موقعے تے جہانگرترین دے وکیل دا کہنا سی کہ جے ڈبلیو ڈی شوگر ملز نوں سابق دور وچ انکم ٹیکس نوٹس گھلے گئے سن جدکہ کمشنران لینڈ ریونیو نے میرے موکل دے حق وچ حکم امتناعی وی جاری کیتا اے۔ عدالتی حکم اُتے کمشنران لینڈ ریونیو کول اپیلاں سنوائی ہیٹھ نیں، لینڈ ریونیو نے 19کروڑ91لکھ 7ہزار دے ریکوری نوٹسز گھلے، ایس لئی معزز عدالت توں بینتی اے کہ عدالت 27اگست نوں جاری کیتے گئے ریکوری نوٹسز اُتے عمددرآمد معطل کرے۔عدالت نے ایف بی آر ولوں نوٹسز معطل کردے ہوئے کمشنران لینڈ ریونیو نوں جہانگیر ترین دی اپیل اُتے 30دناں وچ فیصلا کرن دا حکم دتا تے ایف بی آر نوں تاحکم ثانی انکم ٹیکس ریکوری توں روک دتا۔
