کراچی(پاکستان پوائنٹ نیوز01۔ستمبر۔2018ء) کراچی دے ہسپتال وچ چیف جسٹس آف پاکستان میاں ثاقب نثار دے اچانک دورے دوران شراب دیاں بوتلاں برآمد ہون مگروں ہسپتال انتظامیہ دے حکم اُتے ضیا الدین ہسپتال دا متعلقہ کمرہ سیل کر دتا گیا جدکہ شرجیل میمن نوں وی ہسپتال توں جیل منتقل کیتا گیا اے۔ چیف جسٹس نے اج ہسپتال دے اچانک دورے دوران شراب دیاں بوتلاں ویکھیاں تے شرجیل میمن کولوں اوہناں بوتلاں بارے پُچھیا۔
شرجیل میمن نے جواب دتا کہ مینوں پتا نہیں ایہ میریاں بوتلاں نہیں نیں۔ جیہدے اُتے چیف جسٹس ثاقب نثار نے پولیس نوں معاملے دی تفتیش کرن دا حکم دتا۔ پولیس دے ہسپتال اپڑن توں پہلاں ای انتظامیہ نے شراب دیاں بوتلاں لُکا دتیاں پر پولیس نے شراب دیاں بوتلاں پُن چھان کرن مگروں برآمد کر لیاں، جیہدے مگروں متعلقہ کمرے نوں سیل کرکے شرجیل میمن نوں ہسپتال توں جیل منتقل کر دتا گیا اے۔ایس ایس پی ساؤتھ نے دسیا کہ شرجیل میمن نوں چیف جسٹس دے حکم اُتے جیل گھلیا گیا اے۔ شرجیل میمن دے خون دے نمونے لے لئے نیں جیہدے مگروں معاملے دی ہور وضاحت ہوئے گی۔ ایس ایس پی ساؤتھ نے آکھیا کہ معاملے بارے ہسپتال انتظامیہ تے عملے کولوں تفتیش جاری اے۔
